KNT-amigaartooqqammat Kitaa Seafood utaqqimaarpoq
Ingerlatseqatigiiffik KNT akileraarutinut 1,2 millionit koruuninik akiitsoqarpoq.
KNT-p ingerlanneqarnerata tiguneqarnissaanut neqerooruteqarneq unitsikkallarneqartoq, Kitaa Seafoodimi pisortaq Robert Møller Radioaviisimut oqarpoq.
KNT-p pisortaa, Danmarkimi piginneqatigiiffiit allattorsimaffiat naapertorlugu, tassaavoq Mikael Petersen.
Ingerlatseqatigiiffimmit KNT-mit siusinnerusukkut nalunaarutigineqaraluarpoq, marsip qaammataani ataatsimeersuartoqarumaartoq. Ataatsimeersuarnissarli juunip qaammataanut kinguartinneqartoq siulersuisuni siulittaasuugallartoq Jakob Kruse Uummannameersoq oqarpoq.
Aamma atuaruk Niaqornani sulisut ikiorserneqarsinnaalerput
Siulersuini siulittaasuugallartup ataatsimeersuarnissap kinguartinneqarneranut suna pissutaanersoq oqaatigisinnaannginerarpaa, aaqqitassalli aaqqinneqassasut taanna oqarpoq.
Kitaa Seafoodip pisortaa Robert Møller Radioaviisimut oqarpoq, KNT-p ingerlanneqarneranut neqeroorutigineqarneq unitsinneqarallartoq, KNT-p maanna akileraarutinut akiitsoqartup aningaasatigut inissisimanerata aaqqinneqarnissaata tungaanut.
- Ingerlatseqatigiiffik KNT aningaasatigut inissisimanini aaqqippagu uagutsinnut saaffiginnissinnaapput - ingerlatseqatigiiffiup ingerlanneqarnerata tiguneqarnissaa pillugu, Robert Møller Kitaa Seafoodimeersoq oqarpoq.
Tunisassiorfik Kitaa Seafood ukioq ataatsip matuma siorna pilersinneqarpoq Nuummilu angerlarsimaffeqarluni.
Aamma atuaruk Juullimili akissarsipput kommunimiillu ikiorneqarsinnaanngillat