Niaqornani sulisut ikiorserneqarsinnaalerput

Tunisassiorfimmi Niaqornani KNT-mi sulisut marluk pisortanit ikiorsiissutinik pisinnaanerannik uppernarsaammik tunisassiorfiup aqutsisorigallagaannit tunineqarput. Tunisassiorfiup siulersuisuini siulittaasugaallartup tunisassiorfiup uninnganeranik sulisoqannginerannillu uppernarsaat Qaasuitsup kommuneanut ingerlateqqissavaa.

Allattoq Jaaku Lyberth

februaarip 18-at 2015 18:06

Januaarip qaammataata qiteqqunneranit angutit marluk KNT-mi sulisut akissarsitinneqanngillat suliffissaaleqinermilu tapiissutinik kommunemit tunineqarsinnaasimanngillat.

Qaammatip affaani sulinerminni akissarsiassaanik tunineqanngillat tunisassarsiorfik KNT aqutsisoqanngimmat, pisortap decembarip 19-iani tunuarnerata kingorna.

Siulersuisuni siulittaasuusimasoq aamma tunuarpoq.

Aamma atuaruk KNT-mi sulisut pillugit suliaq ajuusaarnartoq

Angutit marluk Niaqornani sulisut suliffeqannginertik uppernarsarsinnaanngimmassuk suliffeqannginnersiutinik tunineqarsinnaanngitsut kommunemit oqarfigineqarput.

Tamannali ullumi qaangiuppoq.

Tunisassiorfimmi KNT-imi siulersuisuni siulittaasuugallartoq, Jakob Kruse, ullumi ullup qeqqata kingorna nalunaarutigaa, Niaqornani sulisut marluk maanna uppernarsaammik, Niaqornani fabrikkip matoqqagallarneranik takussutissamik peqalissasut.

Aamma atuaruk Niaqornani KNT-mi sulisut pillugit suliaq SIK-mit malinnaaffigineqarpoq

Niaqornani tunisassiorfimmi sulisut Kunuunnguaq Heilmann aamma Niels Rasmussen pisortanik ikiorsiissutinik tunineqarsinnaalissasut Jakob Kruse oqarpoq.

Piginneqatigiiffik KNT kingullermik ataatsimeersuarpoq siorna decembarip 19-iani, tassanilu piginneqataasoq aamma siulersuisuni ilaasortaq Karl-Kristian Kruse maanna aalisarnermut piniarnermut nunalerinermullu Naalakkersuisoq taamani tunuarpoq.

Siulersuisuini siulittaasuugallartup Jakob Krusep tunisassiorfimmi piginneqataasut ataaatsimeersuarnissaat qaqugu pissanersoq ilisimanngilaa, KNT-mik piginneqataasussatut ilimagineqartoq Kitaa Seafood Nuuk maanna isumaqatiginiarneqarmat.

Aamma atuaruk Juullimili akissarsipput kommunimiillu ikiorneqarsinnaanngillat