KNT-mi sulisut pillugit suliaq ajuusaarnartoq
Tunisassiorfimmi KNT-mi sulisut januaarip aappaanili akissarsisimanngitsut aamma pisortanit ikiorsiissutinik tunineqarsimanngitsut KNR-imi ippassaq allaaseraarput.
KNT-p Niaqornani Qaarsunilu tunisassiorfiutaani sulisut sapaatit-akunneri arlaqartut akissarsiaqaratik sulipput.
AAMMA ATUARUK Niaqornani KNT-mi sulisut pillugit suliaq SIK-mit malinnaaffigineqarpoq
Akissarsitinneqarsimannginnerannut pisortaniillu ikiorsiissutinik tunineqarsimannginnerannut pissutaavoq sulinerup unitsinneqarneranut uppernarsaammik allakkiamik amigaateqarneq, tamannalu ajornanngitsumik aaqqissinnaasariaqartoq SIK-ip siulittaasuata Jess G. Berthelsenip oqaatigaa.
- Soorunami tamanna ajuusaarnarpoq taama inissittoqarsimammat, tassami imaattussaavoq sulisitsisoq nalunaaruteqartussaavoq allakkatigut, tunisassiornerup uninnera pissutigalugu sulisut angerlartittariaqarsimallugit, Jess G. Berthelsen oqarpoq nangillunilu:
- Suliffeerunnermi ikiorsiissutinik pinngitsooratik pisussaapput, sapaatit-akunneri 13-it ingerlannerini 182 tiimit angusimagunikkit, taamaattumik imaaliallaannaq aaqqinneqarsinnaasariaqarpoq - aamma aaqqittariaqarpoq.
Tunisassiorfimmi KNT-imi siulersuisuni siulittaasup Jakob Krusep tunisassiorfiulluunniit Kitaa Seafoodip KNT-mik piginnittussatut pilersaarutigineqartumit, tunissassiorfiup matunera pillugu sulisunut allakkianik nassitsisimanngillat.
AAMMA ATUARUK Juullimili akissarsipput kommunimiillu ikiorneqarsinnaanngillat
Piginneqatigiiffimmik KNT-imik Niaqornani Qaarsunilu aallartitsisoq Mikael Petersen Nuummi najugaqarpoq. Mikael Petersen Siumumi siulittaasup tulliata aappaaraa Siumullu qullersaqarfiani atorfeqarluni.
Taassuma KNR-imit apersorneqarnissani itigartitsissutigaa, KNT-imilu sulisut tunisassiorfiup matunera pillugu allakkatigut ilisimatinneqarsimannginerannut apeqqut arlaannaannilluunnit akissutissarsineqarsinnaagunanngilaq.
- Tunisassiorfiit allat, soorlu Royal Greenlandip Polar Seafoodillu suleriaaseq nalunngilluarpaat, taamaattummik sulisut angerlartussanngoraangata nalunaarfigisarpaat, taamaattumillu suliffeerukkallarnermi ikiorsiissutinik pisarlutik, Jess G. Berthelsen oqarpoq.
