Illuatungiliuttut kamapput: Qinersisoqarmalli naalakkersut marluinnaat suli atasut

- Qinigaaffiup massakkut naajartorneranut sulisussanik naalakkersuisunik naalakkersuisooqatigiit toqqaavugut, Múte B. Egede KNR-imut oqarpoq.

Allattoq Christine Hyldal, Teitur Larsen , Karline Platou

septembarip 26-at 2023 12:14

Nutserisoq Najâraq Egede

Inatsisartunut qinersineq ukiut marluk qaammatillu arfinillit matuma siornagut pivoq.Taamanikkut Inuit Ataqatigiit ajugaarujussuarput, taassumallu kinguneraa partiimik Naleqqamik naalakkersuisooqatigiiliorneq.

Naalakkersuisoqatigiit ukiuni marlunni atapput. Naleqqakkut suleqatigineqarunnaarmata taarsiullugit Siumukkut suleqatigineqalerput.

Inatsisartut ataasinngornermi ataatsimiinneranni naalakkersuisut kingumut qassiiliutaapput. Illuatungiliuttut qatsulluinnarpaat naalakkersuisunik taarseraanerujussuaq. 2021-mi apriilimili qinersisoqarmalli naalakkersuisoqatigiinniit maannamut issiasutuaapput Kalistat Lund (IA) nunalerinermut, imminut pilersornermut, nukissiuutinut avatangiisinullu naalakkersuisoq aamma siulittaasoq Múte B. Egede, Inatsisartut siulittaasoqarfianiittoq.

NAALAKKERSUISUNNGORTUT UKUUPPUT

Muté B. Egede (IA), naalakkersuisunut siulittaasuuinnassaaq.
Erik Jensen (Siumut), aningaasaqarnermut naalakkersuisoq.
Naaja Nathanielsen (IA), inuussutissarsiornermut, niuernermut, aatsitassanut, inatsisit atuutsinneqarnerannut naligiissitaanermullu naalakkersuisoq.
Vivian Motzfeldt (Siumut), naalagaaffinngornissamut nunanullu allanut naalakkersuisoq.
Aqqaluaq B. Egede (IA), meeqqanut, inuusuttunut, ilinniartitaanermut, kultureqarnermut, timersornermut ilageeqarnermullu naalakkersuisoq.
Kim Kielsen (Siumut), aalisarnermut piniarnermullu naalakkersuisoq.
Agathe Fontain (IA), peqqissutsimut naalakkersuisoq.
Kalistat Lund (IA), nunalerinermut, imminut pilersornermut, nukissiutinut avatangiisinullu naalakkersuisuuinnassaaq.
Hans Peter Poulsen (Siumut), ineqarnermut attaveqaatersuutinullu naalakkersuisoq.
Jess Svane (Siumut), suliffeqarnermut, ilaqutariinnut, isumaginninnermut nunamullu namminermut naalakkersuisoq.

Ataatsimiinnermi ataasinngormat pisumi illuatungiliuttut naammagittaalliutiminnik annissuingaatsiarput, naalakkersuisoqatigiinnut tatiginnikkunnaarnermik allaat taasisitsillutik.

- Isumaqarpugut Naalakkersuisut siulittaasuata ajoraluartumik siulittaasutut akisussaaffini artorlugu taakutikkaa, Jens Frederik Nielsen, Demokraatit siulittaasuat oqarpoq.

- Naalakkersuisut siulittaasuat siunissamut isiginngilaq, aamma Naalakkersuisut aqussinnaanngilai. Isumaqarpugut akisussaffik tigussagaa.

Qasseriarlutik ullut 100-ssagamik?

Illuatungiliuttut iliuuseqarpallaarsinnaanngillat. Inatsisartunimi issiviit arfineq-pingasut issiavigaat, naalakkersuisoqatigiit Siumut aamma Inuit Ataqatigiit amerlanerussuteqangaatsiarlutik issiaviit 21-t issiavigigaat.

Ataatsimik attaviitsoqarpoq.

Tatiginnikkunnaarnermik taasineq naalakkersuisoqatigiit amerlanerussuteqarnermikkut pinngitsoortippaat.

Taamaakkaluartoq, Naleqqamersut, naalakkersuisut taarseraannerujussuat qatsulluinnarpaat.

Aamma atuarukMimi Karlsen naalakkersuisuujunnaarluni Inatsisartunut siulittaasunngortoq

Mimi Karlsen (IA), peqqissutsimut naalakkersuisutut tallimanngormat tunuarpoq. Peqatigitillugu aalisarnermut piniarnermullu naalakkersuisoq Karl Tobiassen (Siumut) aamma tunuarpoq. Naalakkersuisoqatigiinni inissat marluk ammaanneqarput – naalakkersuisunillu nikerartitsineq nutaaq pilluni.

Aamma atuarukKarl Tobiassen aamma naalakkersuisuujunnaartoq

- Meerannguaq taanna peqqinnissaqarfimmi toqusoq pillugu apeqquteqaateqarsinnaanngilagut. Mimi Karlsenimmi akisussaaffigigaluarpaa, Naalakkersuisoq taartaa aperisinnaanngilarput, susoqarsimanersoq, sooq taama pisoqarnersoq qanorlu iliuuseqalersaarnersoq paasiniarlugu. Apeqquteqarfissaq Mimi Karlsenip Peqqussutsimut naalakkersuisuunerata nalaani pisuuvoq, Pele Broberg oqarpoq.

- Naalakkersuisunngortup akisussaaffigilikkami ilikkarnissaanut ullunik 100-nik periarfissinneqartarnera nalinginnaasuuvoq. Ukiuni qinigaaffinni ullunik 100-qartitsineq qasseriarlugumitaavaana naalakkersuisoqatigiit atorniaraat?, aperivoq.

Qinigaaffimmi uani taarseeqqissanngitsut

Peqqissutsimut Naalakkersuisut uani qinigaaffimmi sisamassaa toqqarneqaqqammerpoq.

Aalisarnermut Naalakkersuisut pingajussaat toqqarneqarluni.

Aamma atuarukAtorfiit inuttalissapput. Múte B. Egedep suliassaa ajornakusoortoq naliliisartoq oqarpoq

- Isumaqatigiinniarnerit ingerlaneranni naalakkersuisut ikerinnakkut taarserneqarunik isumaqatigiginniarnermit allanngortuaannarput, Inuk aalajangersimasoq naalakkersuisuuginnarsimappat politikkikkut isumaqatigiinninniarnerit imaluunniit oqaluuserinninnerit aqqutigalugit suliat naammassiniarneqassalugaluarput. Taanna qularnanngilaq. Soorunami pingajussaa taarseraanni, suliat ingerlaneersut ilaat katataassapput, Jens-Frederik Nielsen oqarpoq.

Múte B. Egede, illuatungiliuttut ullumi tatiginnikkunnaarlutik taasisitsinerat qanoq isumaqarfigaajuk?

- Soorunami tusaatissatut tiguarput. Taamaattorli naalakkersuisuninngaanniit suliassat annertuut aallartereersimasavut angittumik suliarinissaannut piareersimalluta ingerlaqqissaagut.

- Qinigaaffiup maannakkut qiterpaarnerani, aap naalakkersuisut taarserarsimapput. Uanga siulittaasutut akisussaaffigaara, kisianni naalakkersuinikkut massakkut aaqqissuusseqqinneq aamma inuttaliineq tassaasussaavoq qinigaaffiup massakkut qiterpaarneraningaanniit naalakkersuisut anguniakkaminnik naammassinninnissaminnut toqqammavissiffiat, Múte B. Egede KNR-imut oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.