Mimi Karlsen naalakkersuisuujunnaarluni Inatsisartunut siulittaasunngortoq
Mimi Karlsen (IA) peqqissutsimut naalakkersuisuujunnaarpoq.
Inatsisartut siulittaasuat, Kim Kielsen, Inatsisartut ukiaanerani ataatsimiinnerisa tallimanngornermi aallartinneranni taama oqarpoq.
Múte B. Egede (IA) taamaalilluni peqqissutsimut tunngasuni akisussaasunngorallarpoq.
Mimi Karlsen Inatsisartunut siulittaasunngortussatut innersuunneqarnini peqqutigalugu naalakkersuisuujunnaarpoq. IA-p aamma Siumup Mimi Karlsen Inatsisartunut siulittaasussatut innersuuppaat.
KNR-imit Mimi Karlsen Inatsisartuni ammaanersiornermi naapikkatsigu aperivarput, sooq tunuarnersoq, imalu akivoq:
- Polikeriniuneq tassa taamaappoq. Politikeritut sassarsimagaanni, suliakkiussaq tigusariaqarpoq.
Peqqissutsimut oqartussaaffiup allamut tunniunnera qanoq igaajuk?
- Peqqinnissaqarfimmi suliassat suunissaannik siunniussaqareeratta, oqartussaaffiup allamut tunniunnera toqqissisimassutigaara, Mimi Karlsen oqarpoq. Aqqut suna atorneqassanersoq erseqqereerpoq, Mimi Karlsen oqarpoq.
Kina kingoraartaassanersoq nalunarallarpoq.
Kim Kielsenimi Inatsisartunut siulittaasutut qinigassanngorteqqinnianngitsoq
Mimi Karlsenip Inatsisartut siulittaasussatut innersuunneqarnera Inatsisartuni taasissutigineqaqqammerpoq, tamatumunngalu 18-it akuersipput qulillu akerliullutik. Mimi Karlseni taamaalilluni Inatsisartunut siulittaasunngorpoq.
Demokraatit, Atassut Nalerarlu tammatumunnga akerliupput – taakkumi Kim Kielsen qinigassanngortinniarnani aalajangereeraluartoq Inatsisartunut siulittaasussatut innersuuppaat.
Kim Kielsen Inatsisartunut siorna upernaakkut siulittaasunngorpoq. Naleraq aamma Inuit Ataqatigiit taamanikkut naalakkersuisoqatigiikkunnaarlutik Inuit Ataqatigiit aamma Siumut naalakkersuisoqatigiilerput.
Taamaammat Kim Kielsen taamani Inatsisartunut siulittaasunngorpoq.
Naalakkersuisut uani qinigaaffimmi sisamassaraat
Peqqissutsimut naalakkersuisoqarfik tassaavoq naalakkersuisut taarseraaffissuat. Corona peruttulermat Mimi Karlsen naalakkersuisunngorpoq. Pele Broberg, Naleraq, taamani peqqissutsimut, inuussutissarsiutinut aamma niuernermut naalakkeersuisuuvoq.
Naalakkersuisutulli atuunnera sivikippoq. Naleraq Inuit Ataqatigiillu naalakkersuisoqatigiinnertik siorna uperaakkut kipitiimmassuk Naleqqap naalakkersuisuutitai tunuartitaapput.
Pele Brobergip siornagut Kirsten Fencker, parteeqataa tassani naalakkersuisuuvoq. Conorap nalaani 2021-mi naalakkersuisuunermi nalaani uisarusernermik stressemik pissuteqartumik napparsimalerpoq, taannalu aamma pillugu januaari aallartilaartoq 2022-mi tunuarluni.
Muté B. Egede peqqissutsimut naalakkersuisuuffimmut akisussaasuugallassaaq – taamaalilluni apriilimi 2021-mi qinersisoqarmalli naalakkersuisoqarfimmi tassani naalakkersuisuusut sisamaralugu.
