Aliasuuteqartunut Qaqortumi peqatigiiffik nutaaq misigissutsinik suliarinninnissamut sakkussaqalersitsissasoq
Biina Kielsen Qaqortumi iliveqarfimmi nikorfavoq. Naallu taanna qulakkeersimanngikkaluarlugu taassuma ukioq manna ilisinerit amerlanerat maluginiarsimavaa:
- Malugisakka akulikittorujussuupput, ilisisarnerit ingerlanerat maluginiarsimavara.
Naallu nammineq annaasaqanngikkaluarluni aliasunneq malugisinnaalluarpaa:
- Soorunami aamma misiginneqataasaqaanga, ingammik uku aasaq inuunerminnik kipititsillutik peeruttartunnguit, aamma immaqa qanigisarinngikkaluarlugit soorunami innuttaaqataalluta tamavitta sunnerneqartaratta, taanna oqarpoq.
Toqusoqaraangat aliasunneq misigissutsini nalinginnaasuuvoq, aliasunnerli oqaloqatigiinnikkut ataatsimoornikkullu suliarineqarsinnaavoq, Biina Kielsen isumaqarpoq.
Taamaammat Nuummi Sisimiunilu qanigisaminnik imaluunniit ikinngutiminnik annaasaqarsimasunut Aliasoqatinik taaguuteqartunik oqaloqatigiittarfeqarpoq.
Peqatigiiffillu Qaqortumi pisariaqartinneqangaatsiartoq Biina Kielsen isumaqarpoq:
- Aamma inuit assigiinngilagut, aamma inoqarpoq ukiorpassuarni aliasuut annaasaqarnerlu ingerlaqatigigaat, immaqa saperlutik oqaasinnguinissamut.
Aliasoqatigiinneq
Aliasoqatit tassaapput toqusoqartillugu aliasuutinik oqilisaqatigiiffik.
Aliasoqatit Qaqortumi aallartisarlugu sapaatip akunnerata naanerani pikkorissartoqarlunilu isumasioqatigiittoqarmat inuit arfinillit suliamik ingerlatsilersinnaasut piareerput.
- Soqutiginnittut amerlanerusinnaapput, aamma taanna eqqaavara Nuummi uku ingerlasut suli ujartuipput, tassa piumasunut ammavoq. Taava aqunneqarluarpugut, uku aamma aqunneqarluarput Danmarkimiit, Biina Kielsen oqarpoq.
Nunatsinni aliasuut oqaluuserineqarpallaarneq ajormat oqaloqatigiittarfimmi ikiorneqarnissaq amerlasuut pisariaqartippaat.
Aliasoqatit Danmarkimi peqatigiiffiit Sammen om Sorg aamma Det Nationale Sorgcenter suleqatigivaat.
Tamannalu inunnut aliasuuteqartunut sakkussanik tunniussaqarnissamut tunnganerpaavoq, aliasuttut taamaalillutik pissutsinik aqutsisinnaalluarnerussammata:
- Artorsaat taqqamani aliasuut annaasaqarsimanerup sunniutaa eqqartorsimanngisaq anninniarnerani taana qianeq, annernartup takkunnerani aamma teknikki qiariaaseq aamma tamakku sungiusarparput.
Aliasoqatit qaammammut ataasiarlutik nalunaaquttap akunnerini pingasuni naapeqatigiittassamaarput. Biina Kielsenillu aliasunnermik oqaloqatigiittarfiup nutaap iluatsilluarnissaa neriuutigaa.
- Uanga neriuuteqarfigaara immaqa siaruaappat ilimanarpoq soqutiginnittoqassasoq. Isumaqarama pisariaqartinneqarpoq, Soorlu uagut aamma nammitsinnik kajumissutsimik sulerusuttugut pisariaqartikkatsigu.
