Inuuna sorgcenterimi suleqataasoq: Nunatsinni aliasuuteqartoqaqaaq
- Nammineq piumassutsiminnik suleqataalersunut soorlu oqartunga, Kalaallit Nunaani aliasuuteqartarneq pillugu suliani oqaluttuarisaanermik suliaqartutut taaneqarsinnaangajappoq.
Danmarkimi Det Nationale Sorgcenterimi pisortaq, Preben Engelbrekt oqarpoq.
Suliaq tamanna 2017-mi aallartittoq, taanna oqarpoq.
Taamanni Danmarkimi aliasuuteqartunut oqaloqateqartarfik Kalaallit Nunaanni meeqqat atuarfianni ilinniartitsisunit arlalinnit saaffigineqartarpoq.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Ammasarfiit:
Sapaat - Sisamanngorneq 09:00 – 00:00
Tallimanngorneq - Arfininngorneq 09:00 – 04:00
Atuartut qanigisaminnik imminut toquttoqartillugu, ajunaartoqartillugu kræftemilluunniit napparsimallutik toqusoqartillugu qanoq periuseqarfigineqassanersut ilinniartitsisut siunnnersorneqarnissaminnik pisariaqartitsillutik saaffiginnipput.
Aliasuuteqartunulli oqaloqatiginnittarfik Det Nationale Sorgcenter Danmarkimiippoq tassanngaanniillu nunatsinni inuiaqatigiinni pissutsit, kulturi nunatsinnilu innuttaasut qanoq aliasuttarnersut naammattumik ilisimasaqarfigineqarani.
Taamaattumik Danmarkimi alisuuteqartunut oqaloqateqarfik nunatsinni 2018-mit 2019-mut misissuivoq.
- Tassanilu paasivarput nammineq piumassutsiminnik suliaqartunik pisariaqartitsisoqartoq maannalu taakkua aallartipput, Preben Engelbrekt oqarpoq.
Namminneq piumassutsiminnik suliaqartussat siulliit tallimaapput.
Aliasuuteqartunik oqaloqateqartarnerit siulliit novemberip qaamaataani aallartissasut, Preben Engelbrekt paasissutissiivoq.
Nammineq piumassusiminnik suliaqartut suut neqeroorutigisinnaassaneraat kingorna oqaloqatigiissutigineqassaaq.
Inuuna Davidsen nammineq piumassutsimik suliaqartussanut ilaavoq.
- Aliasunneq nunatsinni annertoorujussuuvoq, taamaammat pisariaqartitsisut pisariarqartitsinerlu annertoorujussuuvoq,
Inuuna Davidsen taama oqarpoq.
Inuiaqatigiinni imminut qanitariiffiusumi toqusoqaraangat amerlasuut sunnerneqartarput.
Aliasuttut allat oqaloqatigissallugit ajornarsinnaasartoq, aliasuuteqartut oqaloqatiginniattarfiata misissuinerani erserpoq.
Inuuna Davidsenip tamanna aamma eqqavaa.
Nammineq piumassutsimik suliaqartut aamma ilagaat Rita Thomsen. Aliasuuteqartut alisasuutigisatik pillugit inunnik allanik oqaloqateqarnissaat pingaruteqartoq taanna oqarpoq.
- Aliasuuteqarnermi kiserliornartorujussuuvoq, aamma imminut pisuutinnartorujussuuvoq. Ilassaaleqilluni, taavalu aamma misigisimalluni uanga misigisakka kisima misigivakka, allat taanna misiginikuunngilaat.
Rita Thomsen taama oqarpoq.
Nammineq piumassutsiminnik suleqataasut tamarmik aliasunneq aqqusaarsimavaat. Tamannalu pingaaruteqartoq, Preben Engelbrekt isumaqarpoq. Suleqataasummi aliasuuteqarsimagaluarluni ajunngitsumik inuuneqarsinnaanermik takutitsisut, taanna oqarpoq.
Sulili suliassaqaqaaq.
Misissunermimi paasineqarpoq, meerarpassuit inuussuttorpassuillu imaannaanngitsunik aliasuuteqarnerminnikkut qisuariaateqartartut
- Ajunngitsumik inuuneqassagunik pingaaruteqarpoq aliasuuteqarneq pillugu immikkut ilisimasalinnik oqaloqateqarnissaat. Taamaattumik tamanna pillugu suliniuteqarnissamut soqutiginninnersut tusarusullugit Kalaallit Nunaanni politikerit arlallit oqaloqatigaakka, Preben Engelbrekt oqarpoq.