Karl Tobiassen aamma naalakkersuisuujunnaartoq

Naalakkersuisut marluk naalakkersuisuujunnaartut, Inatsisartut ukiaanerani ataatsimiinnerisa ullumi aallartinneranni nalunaarutigineqarpoq. Tassa Mimi Karlsen (IA) peqqissutsimut naalakkersuisuujunnaarluni Inatsisartunut siulittaasunngorpoq, aamma Karl Tobiassen aalisarnermut piniarnermullu naalakkersuujunnaarpoq.

Naalakkersuisut siulittaasuat, Múte B. Egede (IA), oqaluttarfimmit taama oqarpoq.

Karl Tobiassen naalakkersuisuujunnaarnissi nammineq toqqarpaa.

Taanna ima oqartoq tusagassiutinut nalunaarummi saqqummeqqammertumi allaqqavoq:

- Siorna akisussaaffik pingaarutilerujussuaq tigusussanngorakku nutaamik aalisarnermut inatsimmik pilersitsinissaq neriorsuutigisimavara. Inuttut ajuusaarutigisannik suliaq ukiaq manna Inatsisartunut oqaluuserisassanngortinnissaa angumerineqarsinnaasimanngilaq, taamaattumillu Naalakkersuisutut neriorsuutiga eqquutsissinnaasimanngilara. Tassunga atatillugu politikikkut akisussaaffik tamarmiusoq uanniittoq tiguara.

Tassa Karl Tobiassen naalakkersuisuujunnaarluni Inatsisartunut uteqqippoq.

- Inatsisartunut uteqqinnissara suleqatillu nutaamik suleqatigeqqilernissaat qilanaaraara.

Siorna naalakkersuisunngortoq

Karl Tobiassen aalisarnermut piniarnermullu siorna apriilimi naalakkersuisunngorpoq.

Taanna Inatsiartunut 2021-mi qinersinitsinni 111-niinnarnik taaguunneqarpoq. Taamaammat Inatsisartunut isinngitsoorpoq – sinniisunngorlunili.

Qarsoq Høegh-Damili ikiartoornartoq pillugu eqqartuussaalluni akiliisussanngortitaanikuunini pissutigalugu Inatsisartunut isernissamut Inatsisartunit akuerisaassangatinnginnami tunuarpoq.

Taamaammat Karl Tobiassen taamaalilluni Inatsisartunut iserpoq. Taanna 57-inik ukioqarluni KNAPK-p siulittaasuunerinut ilaasortaajunnaarluni siorna apriilimi aalisarnermut piniarnermullu naalakkersuisunngorpoq. Atuuffigiligaa pingaaqisoq paarlagaaffiukkajuppoq.

- Suliassanut imaannaanngitsunut akisussaasunngorpunga. Aalisartut piniartullu oqinnerusumik atugaqalernissaat anguniassavara, Karl Tobiassen KNR-imut siorna apriilimi oqarpoq.

Aalisarnermut inatsisissaq naammassereersimasussaagaluaq

Taamani naalakkersuisunngorami ulapputissarpassuaqarpoq. Aalisarnermut inatsisissaq 2022-mili naammassereersimasussaagaluaq ulapputissaanut ilaasoq, siorna oqaluttuaraarpoq.

Aalisarneq pillugu Ataatsimiititaliarsuaq aalisarnermut inatsisissamut tunngatillugu 2022-mi innersuussuteqaaluppoq. Aalisarnermi nutarsaalluni attanneqarsinnaasumik aalisalernissaq innersuussutaannut ilaavoq.

Aalisagaarukkiartoqqunagu aalisartullu aningaasarsiuinnarsinnaaqqullugit ataatsimiititaliarsuaq taama innersuussuteqarpoq.

Karl Tobiassen siorna neriorsuutiminik eqquutsitsisinnaasimanninnginini naalakkersuisutut tunuarnerminut tunngavilersuutigaa.