Illoqarfinni avatangiiserisaanillu saliineq Saligaatsoq soqutigineqarluarpoq
CSR Greenlandip ilaasortaasullu suliniutaat, Saligaatsoq, Namminersorlutik Oqartussat, Kommuneqarfik Sermersooq Qeqqatalu Kommunia peqatigalugit ukioq manna piviusunngorsinnaasimavoq.
Illoqarfinni ukioq manna saliinerni Nuummi juunip ulluisa pingajuanni saliisoqassaaq, Sisimiunilu juunip ulluisa tallimaanni. A/S INI taassuma saniatigut nuna tamakkerlugu saliinissamik aaqqissuussaqarpoq, Ilulissanilu Qaqortumilu aamma juunip ulluisa pingajuanni saliisoqassalluni.
Sisamassaa illoqarfinni ukiumoortumik saliisoqassaaq, Nuummilu peqataasussat aatsaat taama amerlatigalutik:
Inuit 300-nit amerlanerusut peqataanissamik nalunaarsimapput, namminersortullu pisortallu suliffeqarfii 27-t peqataanissaminnut nalunaarsimallutik. Ilinniagaqarfiit assigiinngitsut aamma peqataassapput.
Air Greenland qulimiguulimmik timmisartuussisartumillu piareersimatitsissapput, Nuullu Bussii nutaamik illoqarfimmi bussinik ingerlaartumik aallarnisaassaaq, soorlu aamma Nuup illoqarfiata avataatungaaniittunut akeqanngitsumik aallertitsisassalluni.
Namminersorlutik Oqartussanit peqataaniartut 50-it sinnerpaat, Permagreenimit 40-t peqataaniarlutik, Nukissiorfiillu Tele-Postilu tamarmik immikkut 30-nik peqataatitaqarniarlutik.
Saligaatsumut peqataaniaraanni nalunaarnissamut suli piffissaqarpoq, Saligaatsorlu pillugu annertunerusumik paasisaqarniaraanni www.facebook.com/saligaatsoq -mut iserluni taamaaliortoqarsinnaavoq.