Ilisimatusartoq: Angerlarsimaffeqanngitsut nutaamik suliniuteqarnikkut sullilluarneqarnerulissapput

- Angerlarsimaffeqanngitsut ikilisinnissaat angerlarsimaffeqanngitsuujunnaarnissaannillu allanik sukisaarsarnissaannik kaammattornissaat siunertaajuarpoq.

Ilisimatusarfiup isumaginninnermik sulianut immikkoortortaani lektori, Steven Arnfjord, taama oqarpoq. 

Ilaassaagumillu taallugu ilisimatuussutsikkut nutaamik suliniuteqarnikkut taamaaliortoqassaaq. Tassa angerlarsimaffeqanngitsut nutaamik suliniuteqarnikkut sullilluarneqarnerulissapput, Ilisimatusarfillu tamatumunnga tunngatillugu 4,8 millionit koruuninik aningaasaliiffigineqarpoq. 

Nuuk suliniummi tassani aallaaviuvoq, taamaammat Kommuneqarfik Sermersooq tamatumani suleqataavoq. 

Lektorit, Kevin Perryp aamma Steven Arnfjordip, Kommuneqarfik Sermersooq suliniummi tassani suleqatigissavaat. Taakkua marluullutik Ilisimatusarfiup isumaginninnermik sulianut immikkoortortaani lektoriupput. Ilisimatusartullu taakkua aningaasaliisoqarneratigut suliniuteqarsinnaanerulerput. 

- Angerlarsimaffeqanngitsut ikilisinniarnissaannik taamaalilluta suliaqarnerusinnaalerpugut. Tassa angerlarsimaffeqanngitsut sulilluarneqarnerulernissaat suliniutigisinnaanngorparput, ilisimatuussutsikkut suliniummi Ilaassaagumi aqutsisoq Steven Arnfjord oqarpoq.  

Angerlarsimaffeqanngitsut assigiinngiiartunik atugaqartut

Ilisimatusartut marluk taakkua nunatsinni angerlarsimaffeqanngitsunik siullerpaajullutik 2022-mi kisitsipput. Angerlarsimaffeqanngitsutut nalunaarsugaat 491-iupput. Kommuneqarfik Sermersuumi angerlarsimaffeqanngitsutut nalunaarsukkat 258-iusut, taakkunanngalu 156-it Nuummiittut, kisitsineranni erserpoq. 

- Angerlarsimaffeqanngitsut assigiinngiiaqisunik atugaqarput. Eqqimattakkuutaat assigiinngiiaartut aamma amerlapput. Angerlarsimaffittaartuugunik qularnanngitsumik toqqissillutik alloriaqqissinnaarpasittortaqarput, Steven Arnfjord oqarpoq nangillunilu.  

- Aammali oqimaaqisunik nalaataqarsimasortaqarput, taakkualu initaarunik tarnikkut ikiorserneqarsinnaalernissaannik isumaginnittuniillu sullinneqarsinnaalernissaannik kinguneqartussaassaaq, Steven Arnfjord oqarpoq. 

Tamarmilli toqqissillutik siniffigisinnaasamik isersimaarfigisinnaasamillu angerlarsimaffeqannginnertik assigiissutigaat. Taakkualu isumaginninnermi siunnersorneqarnerannik malitseqartussamik namminneq initaarnissaannut ikiuinermik periuseqarfiusumik sullinneqarnissaat siunniussaavoq. 

Kialaarfimmi Williams Cafémi isersimaartut nallukattarrattarput. Assi © : KNR Johansinnguaq Olsen

Ataatsimut isigalugu Nuummi inissaaleqisoqaqaaq, taamaammallu tamaani ineqarniarneq akisoorujussuuvoq. Ilisimatuussutsikkut suliniutertik inuiaqatigiinni tamat angerlarsimaffeqaqqullugit inissianik sanaartortitsinissap ukkatarineqaannarnissaanut iluaqutaassasoq, Steven Arnfjordip neriuutigaa. 

Ilinniartunut kollegiat akisunngitsunik tamat akissaqarfigisinnaasaannik inissialiornissamut isumassarsivigeqqunaqisut, taanna erseqqissaavoq. 

- Ulluinnarni toqqissilluni isersimaarfiusinnaasumik, isumaginnittunit ikorfartorneqarfiusinnaasumik namminerlu initaavinnissamut piareersarfiusinnaasumik ineerarpassualimmik ineqarfeqartuuppaat pitsaassagaluaqaaq, Steven Arnfjord oqarpoq. 

Kommuneqarfik Sermersooq angerlarsimaffeqanngitsunut ineqarfiugallartussamik suliniuteqarnikkut pilersitseqqammerpoq. Angerlarsimaffeqanngitsunut ineqarfiugallartussaq aqqaneq-marlunnik ineeraqarpoq, tassanilu najugallit qaammammut 2000 koruuneertarput. 

Isumaginninnermik sullinneqarnerat ukkatarineqarluartoq

Ineqarfinnilli amerlanerusunik pilersitsiniarneq inissaaleqinermik ajornartorsiummik aaqqiissutaasutuaasinnaanngilaq. 

Angerlarsimaffeqanngitsunimmi sullissisut suliatigut piginnaasaqarluarnerulernissaat aamma ukkatarineqarpoq. Angerlarsimaffeqanngitsunik isumaginninnermik sullissisooreersut suliatigut piginnaasaqarluarneruleqqullugit pikkorissartassapput. 

Tassa angerlarsimaffeqanngitsunik aqqusinerni angalaarlutik ujartuisartut anglersimaffeqanngitsunullu kialaarfinni sulisunik pikkorissaanissaq ilisimatuussutsikkut suliniummi aamma ilaavoq.

- Angerlarsimaffeqanngitsunik sullissisut taarseraappallaarnissaat taamaaliornikkut pinaveersaartinneqassaaq. Angerlarsimaffeqanngitsut sullissisunik aalaakkasunik piginnaasaqarluartunillu ulluinnarni ikorfartorteqarnissaat taamaalilluni qulakkeerneqarsinnaassaaq, Steven Arnfjord oqarpoq. 

Angerlarsimaffeqanngitsunimmi sullissisut taakkua taarseraattorujussuupput, taarseraattorujussuujunnaarnissaallu angerlarsimaffeqanngitsunik ikiuinermik suliallit kissaatigaat.  

Taamaaliortoqarpat angerlarsimaffeqanngitsut taakkuninngalu sullissisut iluaqutaasussamik angerlarsimaffeqanngitsut sullilluarneqarnerulernerannik kinguneqassasoq neriuutaavoq. Tamatumanilu suleqatigiilluarnissaq pisariaqarpoq. 

- Tamannalu iluatsissappat angerlarsimaffeqanngitsut akornanni tatiginninneq toqqissisimanerlu qulakkeerneqaqqaartariaqarput. Innuttaasutut pisortaqarfinnit sumiginnagaasutut misigisarsimagaanni, innuttaasut pisortaqarfiillu akornanni tatiginninneq ajortittarpoq. Taava atassuteqarneq taanna aaqqitassaavoq, Steven Arnfjord oqarpoq. 

Kommunillu angerlarsimaffeqanngitsunik sullissinerinnavimmik aallussaqartunik pilersitsinissaat Steven Arnfjordip kissaatiginerpaajugaluarpaa. 

- Inuusuttut angerlarsimaffeqanngitsut ukioqqortusinnginnerani, sapinngisamillu sivikinnerpaamik avatangiisini taamaattuniinnissaat anguniartariaqarparput. Avatangiisimmi taamaattut inunnik unittoortitsisarput, taamalu inissisimaneq ajorluinnarpoq, Steven Arnfjord oqarpoq. 

Ilisimatuussutsikkut suliniut Oak Foundation Danmarkimiit 4,8 millionit koruuninik aningaasaliiffigineqartoq, 2024-miit 2026-mut ukiuni pingasuni ingerlanneqassaaq.  

Suliniut Ilisimatusarfiup Issittumi atugarissaarneq pillugu immikkoortortaanit aqunneqarpoq, tassanilu Steven Arnfjord aqutsisuuvoq.