Qinersineq Ilinniartitaaneq qineqqusaarnermi pingaarnertut sammineqartoq

Ilinniakkanut ingerlaqqiffiusunut pitsanngorsaatissatut kaammattuuteqarfiusumik ilinniartitaaneq sammineqarpoq. Ilinniarfinni atugassarititaasut ilinniartullu atugaat sammineqarput. Meeqqallu atuarfiata kingorna meeqqat ilinniaqqinnissaminnut piareersarluarnissaat anguniarlugu "Atuarfitsialaap" allanngortiterneqarnissaanik partiit amerlanerit siunniussaqarsimarpasipput.

Atassut: '11. klassi Atuarfitsialammut eqquteqqinneqarli'

11. klassip 'Atuarfitsialammut' eqquteqqinneqarnissaa Atassutip sulissutiginiarpaa, partiilli aamma innarluutilinnut ineriartornermikkullu akornutilinnut, meeqqat atuarfianit soraarumiinnginnerini, ilinniartitaanermut iliuusissatut pilersaarusiortoqartalernissaa sulissutiginiarpaa.

Ilinniartut ineqarfiinik ilinniarfinnillu amerlanerusunik sanaartornissamik ilaatigut anguniagaqarput aammalu kalaallit ilinniarsimasut Nunatsinni suliffinnut salliutinneqartarnissaat sulissutiginiarlugu. 

Kalaallit ilinniagaqartut pitsaanerusunik atugassaqartilernissaat aamma Atassutip Inuusuttaanit oqariartuutigineqarpoq.

Aamma atuaruk Atassutip Inuusuttaasa qineqqusaartitassai

- Nuna tamakkerlugu sungiusaatigalugu suliffinnik ataavartunik pilersitsisoqarnissaa sulissutiginiarparput, Atassut sinnerlugu qinigassanngortittoq Masauna Peary taama allappoq.

Demokraatit: Akisussaaffimmik tigusisoqarli

Ilinniartitaaneq pitsaanerpaamik ingerlanneqassappat, taava illuatungeriit tamaasa annerusumik piumasaqarfigineqartariaqartut Demokraatit isumaqarput. Demokraatit ataatsimut isigalugu isumaqarput aaqqiissutissarsiornermi misigissutsititigut amigaatigineqartut misissuiffigineqartariaqartut.

Aamma atuaruk Demokraatit: Nunatsinni ilinniassagaanni allamiut oqaasii pisariaqartinneqarput

- Atuartut ilinniarnissaannut sakkussaannullu nunatta pisariaqartitaanut tulluarsakkanik piumasaqaateqassaaq malinneqartussanik. Tamannalu qullasinnerpaamit aallartinneqassaaq, Randi V. Evaldsen Demokraatineersoq taama allappoq.

Atuarfinni aqutsisut atuartitsisut sulinerisa pitsanngorsarnissaannut erseqqissunik anguniagaqarlutillu iliuusissatut pilersaaruteqassapput.

Atuartut soqutiginnilersikkumallugit atuartitsisut atuartitsinissaminnut piareersarluarsimassapput.

Angajoqqaat meeqqamik atuarnerinut akuunerussapput. Meeqqaminnut aalajangersimasunik sinaakkutissaqartitsissapput, meeqqat ilinniakkerisassapput qasuersimallutillu atuariartortassallutik.

Inuit Ataqatigiit: Atuarfeqarnerup aaqqissuuteqqinneqarnera nukittorsarneqarli

Meeqqat atuarfiinik sanaartornissaq nutarterinissarlu Inuit Ataqatigiit pingaarnertut anguniagaraat. Suliffeqarfiit atuarfinnut akuutinnerulersinnerisigut meeqqat atuarfiat suli qimannagu ilinniakkamik toqqaanissaq ajornannginnerulersinneqassaaq.

Aamma atuaruk Politikeri inuusuttoq: Imminut pilersorneruneq angorusuppara

Ilinniartitaanerup iluarsartuuteqqinneqarnera maanna atuuttoq aamma taakku iluarivallaanngilaat, taamaattumillu aaqqissuussaanikkut allannguisoqarnissaa kissaatigalugu: Ilinniarfiit ilinniartullu ineqarfii amerlanerusut aammalu innarluutillit ilinniarnissaminnut periarfissaasa inatsisiliornikkut pitsanngorsarneqarnissaat sulissutiginiarpaat.

- Ilinniarnerni tamani pinngortitalerinerit, fysik kemilu qaffassarneqassapput. Tassa meeqqat atuarfianni, inuusuttut ilinniarfianni, universitetemi innuttaasullu akornanni, tamannalu pissaaq pikkorissarsinnaanerit pilersinnerisigut, IA taama allappoq.

Partii Naleraq: Ilinniartitsisut amerlanerusut

Nunatsinni ilinniartitsisussaaleqinerujussuup iliuuseqarfiginissaa Partii Naleqqap siullertut sulissutiginiarpaa. Nunaqarfinni atuarfinni ilinniartitsisut ilinniarsimasut amerlanerussapput, peqatigisaanillu ilinniartitsisut amerlanerusut ilinniaqqinnissamut aqqutissiuunneqassallutik. Partiip aamma angajoqqaat meeqqamik atuarfimmi atuartitaanerannut peqataanerulersitsikkusuppai atuarfimmilu pisortat siulersuisullu akornanni oqaloqatigiinneq pitsaanerusoq angujumallugu.

Kalaallisut oqaatsit inatsisit malillugit atorneqalernissaat partiip aamma piumasaraa, tamannalu ilinniartitsinikkut piviusunngortinniarneqarpoq. 

Inuusuttut nunani allani ilinniarnissaannut aningaasaliinerunissaq partiip aamma pisariaqarsoraa.

Ilinniartut ilaqutaqartut ineqarnermut, tapiissutinut meeqqallu paarineqartarnerinut pitsaanerusunik atugassaqartinneqassapput, peqatigisaanillu ilinniartut illoqarfigisaminni ilinniartut ineqarfiini inissamik tunineqarnissaat piviusunngortikkusunneqarpoq.

Najugaqavissut peqataatinneqarnissaat qulakkeerniarlugu, Partii Naleqqap ilinniartitaanerit annertusartuarnissaat aamma sulissutiginiarpaa. Tamannalu kommunit, kattuffiit suliffeqarfiillu suleqatigalugit sulisunik piginnaanngorsaaqqiinikkut aammalu ilinniartitaanerit nutaat pilersinneqarnerisigut pissaaq.

Partii Inuit: Ilinniartitaaneq nunarsuatsinnut sammiveqartoq

Partii Inuit ilinniartitaanermut tunngatillugu pingaartinnerpaasaat tassaavoq kalaallit nunani allani ilinniagaqarnissaannut periarfissat nukittorsaavigineqarnissaat. Tamannalu nunat sanilerisat ilinniartoqarfiinik siammasinnerusumik suleqateqarnikkut anguniarpaat. 

Taamaaliornikkut inuusuttut nunarsuarmi ineriartornermut malinnaasinnaanissaat aamma qulakkeerneqassasoq, Nikku Olsen isumaqarpoq.

- Qallunaat ilinniartitaanikkut aaqqissuussinerat atorlugu soqutigisaallu aallaavigalugit ilinniartinneqartarpugut. Tamanna allanngortinneqartariaqarpoq. Ilinniartut amerlanerusunik periarfissaqarnissaat ammaanneqassaaq, Partii Inuit siulittaasuat Nikku Olsen taama oqarpoq. 

Siumut: Meeqqat atuarfiat ineriartortinneqassaaq

Nunatsinni ilinniartut ineqarfiini atukkat pitsanngorsarneqassapput. Ilinniartut ineqarfiinik ilinniarfinnillu amerlanerusunik sanaartortoqassaaq, aamma innarluutilinnut ilinniarnissamut neqeroorutit amerlanerulersinneqassapput.

Peqatigitillugu atuartut ilinniakkanut ingerlaqqiffiusunut piareersarluarneqartassapput. Ungasianit ilinniartitsineq annertusarneqassaaq, pingaartumik nunaqarfinni, 11. klassilu 'Atuarfiatsialammut' eqquteqqinneqassaaq.

- Atuarfinnik pitsaasunik atuartitsiveqartunik atortorissaaruteqartunillu pilersitsinissarput pingaaruteqarpoq, assersuutigalugu ilinniartoqarfinni akeqanngitsumik internetteqartitsilluta, Siumut sinnerlugu qinigassanngortittoq, Nick Nielsen, KNR-imut taama oqarpoq.

Aamma atuaruk Siumumit qinigassanngortittoq: Ilinniartut atugaat pitsanngorsarusuppakka

Aamma atuaruk Nick Nielsen: Ilinniagaqarnersiutit qaffannissaat tunngavissaqanngilaq

Kalaallit ilinniarsimasut pisortani atorfinnut siunissami salliutinneqartarnissaat partiip neriorsuutigaa. Tamannalu ilinniarsimasut amerliartornerat ilutigalugu pissaaq, taamaaliornikkut sulisussanik tikisitsisarneq annikillisarniarlugu.

Partiit assigiinngitsut sunik sulissuteqarniarnersut KNR tv-kkut toqqaannartumik qineqqusaartitsilerpat takusinnaavat. Tamanna pissaaq aqagu pingasunngornermi novembarip aqqaneq-aappaani, kalaallisut nal. 19:30, qallunaatullu nal. 21:00.