Politikeri inuusuttoq: Imminut pilersorneruneq angorusuppara

Múte B. Egedep, 27-nik ukiullip, Nunatta iluani imminut pilersorsinnaaneq siuarsarusuppaa, tamannalu inuussutissat pillugit aqutsisoqarfik Nunatsinnut nuunneratigut pisinnaasoq takorloorpaa. Taamaaliornikkut Nunatsinnut tulluartunik inatsisiliortoqarsinnaalissasoq upperigamiuk.

- Annerusumik neqissaqarniarnermik naatitsinermillu tunisassiornermik inuussutissarsiuteqartunut sinaakkutitigut atugassarititaasut pitsanngorsarnissaat angorusuppara. Taamaaliornikkut Nunatsinni imminut pilersorneq Nunattalu pissarititaanik niuerneruneq anguneqarsinnaammat, Múte B. Egede KNR-imut oqarpoq.

Taassuma nioqqutissanik Nunatta avataaneersunik pisisarneq annikillisarusuppaa, avammullu tunisassiornermik siunertalimmik suliniutilinnut pisortat tapersiinerunissaat angorusullugu.

- Nunatsinni ineriartortinneqarsinnaasut, soorlu tunisassiaatigut, computerit atorlugit programminik ineriartortitsisut, kulturilerisut inerititaat, soorlu filmiliorneq ilaalu ilanngullugit ineriartorteqqitassaqqissuupput, Múte B. Egede oqarpoq.

Ilinniartitaaneq pitsaanerusoq
Múte B. Egedep Inatsisartunut isissaguni ilinniartitaanerup iluani aaqqissuusseqqinnissaq anguniagaasa pingaarnerit ilagaat. Aaqqissuusseqqinnerlu meeqqat atuarfiini aallartittariaqartoq oqariartuutigaa.

- Meeqqat atuarfiini naammassisartut akornanni ilinniarfinnut ingerlariaqqinnissaminnut piareersimanngitsut amerlavallaartut naluneqanngilaq. Taamaammat kattuffiit susassaqartullu, soorlu Sulisitsisut Kattuffiat, IMAK aamma SIK allallu suleqatigalugit meeqqat atuarfii qanoq pitsanngorsarneqarsinnaanersut misissorneqartariaqarput, Múte B. Egede isumaqarpoq, nangillunilu:

- Taakku suleqataasariaqarput, suut tamarmik qulaanit politikkikkut aaliangerneqassanngippata.

Taassuma ilinniartorpassuit ilinniakkamut atatillugu suliffimmik misiliiffissaarullutik suliffissaaruttartut aamma maluginiarsimavai.

- Nunatta suliffeqarfiutai ilinniartunik suliffimmik misiliiniartunik tigusisinnaaneq pikkoriffiginerusariaqarpaat, ataatsimoorluta suleqatigiiffigalugu tamanna anguniartariaqarparput, Múte B. Egede oqarpoq.

IMAK isumalluartoq

Ilinniartitsisut Meeqqat Atuarfianeersut Kattuffianni (IMAK) siulittaasup, Sivso Dorphip, meeqqat atuarfiini aaqqissuusseqqinnissamut peqataatinniarneqarneq iluatinnaatilittut isigaa.

- Iluatinnartorujussuuvoq. Nalunngilarput meeqqat atuarfianit naammassisartut angusaat pitsaanerusinnaasut, taamaammat peqataatinneqarnissarput kissaatigaarput, Sivso Dorph KNR-imut oqarpoq.

Taanna oqaluttuarpoq meeqqat atuarfiini equngassutit pitsaanngorsarneqarsinnaasullu suuneri massakkut KANUKOKA ilinniartitaanermullu naalakkersuisoqarfik suleqatigalugit Nuna tamakkerlugu misissuititsineq ingerlanneqaleruttortoq Danmarks evalueringsinstitut (EVA) misissuisoralugu, iliuuseqartoqartinnagulu misissuinerup inernissaata utaqqineqarnissaa kissaatigalugu.

- Meeqqat atuarfii pillugit oqallinneq aallartitsinnagu nalilersuinerup inernerata utaqqeqqaarneqarnissaa kissaatigaarput, Sivso Dorph oqarpoq, oqaatigalugulu EVA-p misissuineranut takussutissat ukiup naanerani piareerumaartut naatsorsuutigalugu.