Nick Nielsen: Ilinniagaqarnersiutit qaffannissaat tunngavissaqanngilaq
- Sioorasaarineq ilinniagaqarnersiutaarunnissamut ilinniartut ilinniartoqarfinni ingerlatsinerannik annerusumik qulakkeerinninngilaq, Nick Nielsen oqarpoq.
- 2005-imi ilinniagaqarnersiutit qaffanneqarput, qaffannerisalu kingunerisaanik takusinnaavarput ilinniagaqartut amerlanerulinngittut. Pinngitsaalillugit aggertillugit neriorsorlugillu ilinniagaqarnersiutai qaffanneqassasut ilinniartut tassuunakkut amerlisarneqarsinnaanngillat, Nick Nielsen nassuiaavoq.
Ilinniartut ilinniarnerminnut piumassuseqarnerulissasoralugit, ilinniagaqarnersiutit qaffanneqassasut Masauna Pearyp qineqqusaarutigaa. Qaffanneqarpatalu ilinniartut takkutinngitsut ilinniagaqarnersiutaannik ilanngaaffigineqartassallutik.
Aamma atuaruk Atassut: Ilinniagaqarnersiutit qaffanneqarlik
NIck Nielsenili akerlianik isumaqarpoq ilinniartut pitsaasumik siunnersorneqarnermikkut unitsitsiinnannginnissaat qulakkeerneqarsinnaasoq.
- Assersuutigiinnarlugu ilinniakkamik aallartitsinnginnermi siunnersuisarnerit Nunatsinni pitsaanerusariaqarput. Naalakkersuisuuninni siunnersuisarnermi inatsimmik pilersitsivunga, kujataani misilittagaqarfigineqarluarpoq aamma taassuma ukiuni tulliuttuni sunniuteqarluarumaarnera neriuuteqarfigilluarpara.
- Oqaatigerusuppara pingaaruteqartoq ilinniarfiit illutaat aamma ullumikkumut tulluuttumik aaqqissuunneqassasut, soorlu ilinniartoqarfinni internettimut attaveqarsinnaanerit ajornannginnerusut. Tamakkuuku suliniutit assigiinngitsut ilinniartunik amerlanerusunik pilersitsisinnaasut, ilinniartitaanermut naalakkersuisuusimasoq, Nick Nielsen, oqarpoq.