Ilinniagaqarsimanngitsut napparsimakulanerusarput

Ilinniagaqarsimanngitsut sivisoorsuarmik napparsimakkajunnerusarput – tamatumunnga pissutaalluinnarpoq suliffimmi isumannaallisaanikkut pissutsit, Danmarkimi misissuinermi tamanna erserpoq.

Ilinniagaqarsimanngitsut pisortaanernut, nakorsanut ilinniagartuunullu, kiisalu ilinniakkaminnik ingerlatseqqittartunut, naleqqiullugit sisamariaammiit arfinileriaammut annertunerusumik sivisuumik napparsimanissaminnut qaninnerusarput.

Suliffimmi isumannaallisaanikkut pissutsit pillugit atuagassiaq Magasinet Arbejdsmiljø, naapertorlugu ilisimatusarnikkut misissuinerit tamanna ersersippaat. Ilinniagaqarsimanngitsut napparsimakulanerunerannut pissutaanerpaavoq suliffimmi isumannaallisaaneq, misissuinermi ilisimatuut ilaat, Karl Bang Christensen taama isumaqarpoq. Pisortaanertuulli atorfikkaatullu allatulli atugarissaartitaasuugunik ilinniagarsimanngitsut sivisuumik napparsimasarnerat aamma affaannanngussagaluartoq, misissuinerup ersersippaa.

Karl Bang Christensenilli nassuerutigaa ilinniagartuut eqqiaasartullu suliffiisa assigiimmik avatangiiseqarnissaat soorunami ajornakusoortoq, tamannali anguniarneqarsinnaasoq.

- Inuppassuit oqimaatsulerisarput, timitillu eqqortumik atorneq ajorapaat. Tamannali allanngortinneqarsinnaavoq, Karl Bang Christensen nutaarsiassaqartitsivimmut Ritzauimut oqarpoq.