Ittoqqortoormiit: Ilagiit sinniisaasa amigaataanerat inatsimmik allanngortitsisariaqartitsilersoq
Ittoqqortoormiit oqaluffianut sulisussarsiorneq ajornartorsiutaareertigisoq ilagiit sinniisaannut apriilimi qinersisoqalermat sassartoqanngimmat tamatumunnga ajornannginnerulersitsinngilaq.
Palasinimmi nutaanik atorfinitsitsiniarnermi ilagiit sinniisaat pingaaruteqartorujussuusarput. Taakkumi atorfinittussanik inassuteqarsinnaapput sinniisoqannginneralu malittarisassanik maanna atuuttunik malittarinninniarnermut ajornartorsiutaalerpoq.
Taamaammat naalakkersuisut Ittoqqortoormiini ilagiit sinniiseqanngikkaluartoq palasimik atorfinitsitsiniarnermut immikkut malittarisassaliorniarput.
AAMMA ATUARUK Ittoqqortoormiini nutaanik aqquserngiortoqarlunilu kussiortoqalersoq
Inatsip allannguutaani ilagiit sinniisai atornagit biskoppip provsteqarfimmit Qeqqa Tunumit provsti peqatigalugu qinnuteqartut ikinnerpaamik pingasut naalakkersuisunut inassutigissavaat taakkulu palasertaassaq qinertassallugu.
Taanna malittarissaq nutaaq Ittoqqortoormiini ilagiit sinniisoqannginneranni taamaallaat atuutissaaq. Qinersinissap tulliani sinniisussanik qinersisoqassappat nunatsinni oqaluffiit ilagiillu sinniisaasa maanna malittarisaat atuutilersinneqaqqissapput.
AAMMA ATUARUK Ittoqqortoormiini ivigaasaaqqanik arsaattarfik pisortatigoortumik atoqqaartinneqartoq
Naalakkersuisut Illoqqortoormiinut tunngatillugu inatsisip allannguutissaanut siunnersuutaat maanna tusarniaassutigineqarpoq. Oqaaseqaatigineqarsinnaasut Ilinniartiaanermut, kultureqarnermut, Ilisimatusarnermut Ilageeqarnermullu Naalakkersusioqarfimmut kingusinnerpaamik septembarip tallimaani nassiutereerneqassapput.
Ittoqqortoormiini palasimik 2008-mili atorfeqartoqarsimanngilaq.
