Ittoqqortoormiini ivigaasaaqqanik arsaattarfik pisortatigoortumik atoqqaartinneqartoq

Sila nillataaraluartoq innuttaasut amerlasuut ammaanersiornermut peqataajartorlutik takkupput. Utoqqaat inuusuttullu kaffisuupput, tiitorlutik saftimilluunniit, kaageqarlunilu naatitaqarpoq. Kommuneqarfik Sermersooq nittartakkamini taama allaaserisaqarpoq.

Ittoqqortoormiinit kommunalbestyrelsimut ilaasortaq Erling Madsen arsaattarfimmik ammaasuuvoq. Maluginiarpaa meeqqat inuusuttullu ivigaaraasalimmut orniguttalereersut:

- Tamanna tupinnaannarpoq, tassami arsaattarfiit taamatut ittut pilersiortorneqarnissaat aalajangernikuugatsigu. Inuusuttuaqqat timersornertik pinnguartarnertillu nuannarissavaat – tamannalu inuunermik nuannarisaqarnermik annerulersitsisarpoq peqqinnarlunilu – soorlu aamma siorna ukiukkut sisorartarfimmi majuartarfittaaratta. Tamakku tamarmik suliniutaapput maani Ittoqqortoormiini timersornerulernermik malitseqartitsisut – tamannalu ilutigalugu nuannaalersitsisut, taamaattumik pitsaanerusinnaagunanngilaq, Erling Madsen taama oqarpoq.

Arsaattarfittaami arsarluni ajugaaniunnermik unnuk naggaserneqarpoq.