Naalakkersuisoq akit qaffannissaat pillugu: Ikiorsiissuteqartoqassaaq

Ukiortaaq aallartippat ukioq nutaaq kisimi malunnarnavianngilaq – ukiorli nutaaq aamma akisunerussagunarpoq.

Royal Arctic Linemmi assartuinermut akit ukiup nikinneranit qaffattussaavai, tamannalu niuertarfinni akitigut malugineqarsinnaassaaq.

Tamanna Brugsenip Pilersuisullu siusinnerusukkut uppernarsarnikuuaat.

Nunaqarfinnili innuttaasut ilaat aningaasaqarnikkut ajorsaateqalereerput. Tamanna akit qaffannerannik aammali nunatta avannaani piniarnissamut periarfissaalatsinermik pissuteqarpoq.

Ikiorsiissuteqartoqalerporli.

Tamanna aningaasaqarnermut naalakkersuisup, Erik Jensenip (S) oqaatigaa.

- Nunatsinni inuuniarnikkut assigiinngitsutigut atukkat imaannaanngissiartornerat iliuuseqarfigisariaqarparput. Taamaattumik naalakkersuisuninngaanniit suliagut illerngit arlalinngorlugit massakkut ingerlassimalerpagut, taakkulu aamma illerngit qanoq tunngaveqarneri avammut nalunaarutiginissaat pissapput piffissami qaninnerpaami, taanna KNR-imut oqarpoq.

Naalakkersuisut siunissami qaninnerusumi millioninik arlalinnik immikkoortitsinissamut piareersimasut taassuma uppernarsarpaa.

Naalakkersuisut Royal Arctic Linep assartuinermut aningaasartuutinik qaffaannginnissaanut 30 millionit koruuninik siorna aamma immikkoortitsipput. 2024-mullu aningaasanut inatsisissamut umiarsuaatileqatigiiffimmut 8 millionit koruunit aamma immikkoortinneqarlutik.

Taakkuli naammassimanngitsut, Erik Jensen nassuerpoq.

- Aningaasarpaalunnik RAL-imut toqqaannartumik aamma ikiorsiinissat assigiinngitsut ingerlanneqarnikuupput, taamaalilluta atuisunut aamma sunniuteqarnissaat anguniarneqarnikuusimagaluarluni. Kisianni taanna atuisut annerusumik maluginngilaat, ajoraluartumik. Taamaattumik massakkut ikiorsiinissatsinni toqqaannarnerusumik ilaqutariit meerartallit, isertitakinnerusut aammalu nunap immikkoortuisa ilaaniittut inuuniarnermikkut assigiinngitsutigut ilungersunartumik meeqqallu kaattut aamma apuunneqartarnerat meeqqallu oqaaseqartartuat aamma apuussai imaannaanngitsut pimoorullugit suliarisimalerpagut, taanna oqarpoq.

Politikkikkut tapersiisoqarnissaa pisariaqartoq

Ikiorsiissutissalli qaqugu piariissanersut Erik Jensenip oqaatigisinnaanngikkallarpaa. Inatsisartunimi tapersiisoqaqqaarluni tamanna itinerusumik oqaaseqarfigisinnaavaa.

- Aningaasaqarnermut akileraartarnermullu ataatsimiititaliamut qinnuteqaat massakkut nassiussimalerparput, taakkulu aamma suliassamik ingerlatsereersimariarpata taava qanoq ilusilerlugu naammassineqarnersoq qulakkiilaariarlutigu inuiaqatigiinnut naammassinissaa qulakkiilariarlugu nalunaarutigiumaarparput. Kisiat neriuutigivarput aamma siunertarivarput, juullertinnagu naammassisaqarsimalluta arlaatigut apuussaqarsinnaanissarput taanna siunertarivarput.

Taassumali naalakkersuisut maannakkut pingaartumi nunaqarfinni isorliunerusuni ajornartorsiutaasut ilimaarilluaraat erseqqissaatigaa.

- Tassalu nioqqutissat akii, nunatta immikkoortuisa ilaanni, minnerunngitsumik Pilersuisup akigititaani, aamma massakkut naalakkersuisut siulittaasuat oqaloqatigiilluta aallartissimaleratta, taamaalilluta akilersueriaaseq taamatullu inissisimatitsisarnerat qulaajarlugu misissuiffigineqarnissaat aamma eqqartukkatta suliniarnitsinni ilanngullugu naammassinissaa pilersaaruteqarfigileratsigu.

Naalakkersuisut siunissami qaninnerusumi ikiorsiissutissat saqqummiussinnaassallugit naatsorsuutigaa.