Akinik qaffaanerit kingunerluuteqangaatsiarput: Meeqqat inersimasullu kaallutik innartarput
Nunatsinni aningaasaqarnermut siunnersuisoqatigiit akit 2024-mi 5 procentit sinnerlugit qaffannissaat naatsorsuutigaat.
Tamanna aningaasat naleerukkiartornerisa malitsigaat. Kisianni RAL-ip assartuinermi akigititaminik 6,4 procentimik januaarip aallaqqaataaniit qaffaaniarluni aalajangernera, siunnersuisoqatigiit eqqarsaataannut ilaanngilaq. Taama aalajangerneq, akit qaffaatissaasa qularnanngitsumik 5 procentimik qaffasinnerunissaannik kinguneqartitseqataassasoq, Inuiatigiilerinermik Ilisimatusarfimmi ilisimatusartoq Birger Poppel naliliivoq.
- Nioqqutissat ulluinnarni atugassat nuna tamakkerlugu akitsoreernikuupput. Ingammik Pilersuisoq taassumalu pisisartui eqqugaanikuupput, taanna oqarpoq.
- Tassalu nunaqarfippassuarni akit immikkut ittumik qaffannikuupput, takkualu akitsoqqissapput.
Akitsuinerli inunnut ataasiakkaanut inuiaqatigiinnullu qanoq isumaqarpa?
Kaallutik innartartut
Periarfissat assigiinngitsut arlaliupput, kisianni aningaasaqarnikkut ilimaginninneq naapertorlugu innuttaasut ataasiakkaat eqqugaassasut, Birger Poppel nassuiaavoq, taassumalu eqimatta marluk assigiinngitsut eqqaavai:
Nalinginnaasumik isertitaqartut isertitakinnerpaallu.
- Nalinginnaasumik isertitaqartut aalisakkat piniakkallu eqqaassanngikkutsigit nerisassat peqqinnarnerusut akisunerukkajuttuusut pisiarissaarsinnaavaat. Taavali ilaqutariit isertitakinnerit qiviariarutsigit:
- Ilaanni kaaallutik innarttartunik meeraqarlunilu inersimasoqartoq, misissuinerniit assigiinngitsuniit ilisimavarput. Ilaqutariit taakkua periarfissalunnerulerlutillu atugarliornerulissasut qularnanngilaq, Birger Poppel oqarpoq.
Pitsaannginnerusumik ilinniartut
Naligiinnginneq inuiaqatigiit ataqatigiissinaassusiannut kinguneqarnerlussinnaasoq, ilisimatusartoq oqarpoq. Aamma naammavinnatillu pitsaavinngitsunik nerisaraanni, tamanna peqqissutsimut ilikkarsinaassutsimullu sunniuteqarsinnaasoq, taassuma tikkuarpaa.
- Ataasiakkaanut soorunami naatsorsuereertoqarsinnaanngilaq: tassa akit maanna qaffaatigineqartut pissutigalugit meeqqat atualertut pitsaannginnerusumik ilinniagaqassasut oqartoqarsinnaanngilaq, kisianni tassunga ilapittuutaasoqarsinnaavoq. Naligiinnginneq amersuunik isiginniffiusinnaallunilu kingunerluutaasinnaavoq – aamma siunissamut ungasinnerusumut, Birger Poppel oqarpoq.
Royal Arctic Line assartuinermi akinik qaffaasoq, Namminersorlutik Oqartussat pigaat. Tassalu naalakkersuisut akitsuinermut iliuuseqarnissamut periarfissaqarput. Assersuutigalugu inuiaqatigiit ilaat eqqugaanerpaat iluarsiissuteqarfigineqarsinnaapput.
Siunissamut takorluukkat
Ilisimatusartut isaanninngaanniit – eqimattat eqqugaanerpaasussat taarsiissuteqarfigineqarnissaat attanneqarsinnaassava?
Eqqugaanerpaasullumi iluarsiissuteqarfigigaanni pitsaaquteqarsinnaasoq, ilisimatusartoq isumaqarpoq.
- Aap, tamaalluarsinnaavoq. Ilaatigut malittaasinnaasut ajornersaat taariikkama ilaat pinngitsoortissinnaavaat, taavalu inuit takusariikkatsitut tunniutiinnarlutik illoqarfinnut nussulernissaat pinngitsoortissinnaallugu.
Taamaliussagaannili suliffiit inissiallu najussallugit akilerneqarsinnaasut iluarsiissutaasariaqartut, Birger Poppel, isumaqarpoq.
- Inuiaqatigiit sumunnarnerannik takorluukkanik maqaasivunga. Suniartugununa? Allannguutillu assigiinngitsut siunissami qaninnermi ungasinnermilu qanoq kinguneqassappat?
