Politikerit arlallit RAL-imit akinik qaffaassutit narrutsaatigigaat

RAL-ip assartuinermut akinik qaffaanera pissutigalugu nioqqutissat aappaagu akitsortariaqartut Brugsenip Pilersuisullu pingasunngornermi oqaatigaat.

Ulluinnarni atortussat akiisa qaffaqqinnginnissaat pissutigalugu Inatsisartut aappaagumut aningaasanut inatsisissap ilaatut 8 millionit koruuninik immikkoortitsinerannit sapaatit akunneri pingasuunngitsulluunniit qaangiupput.

Naleqqamit Jens Napaattooq aningaasanut inatsisissaq novembarip aallartinnerani saqqummiunneqarmat ilaavoq – tassanilu nioqqutissat akiinik appasitsitsinissamut 8 millionit koruuninik isumaqatigiissuteqartoqarnera partiimi isumaqatigiissutiginiagaanit tulluusimaarutiginerpaallugu erseqqissaatigaa.

Taamaammat 8 millionit koruunit taakku RAL-ip akinik qaffaaneranit suujunnaarsinneqarnissaat aamma ugguutigaa.

- Isorliunerusuni aammalu nunarput tamakkerlugu pissakinnerusut maannakkut inuuniapiloorput, nioqqutissat peqqutit assigiinngitsut peqqutigalugit nunarsuarmi akitsupiloornerat nunatsinnut sunniunnera naalakkersuinikkut qanoq iliuuseqarfigineqartariaqarpoq, taanna oqarpoq.

Tapersiinissaq isumaqatigiinngissutaasoq

Jens Napaattuup innuttaasunut tapersiisoqarsinnaanerata misissorneqarnissaa piareersimaffigalugu oqaatigaa – taamaaliornikkullu 8 millionit immikkoortinneqareersut saniatigut tapersiissuteqartoqartoqarsinnaassalluni.

Ulluinnarnimmi ataqatigiissitsiniarnerup akisunissaa naapertuinngitsoq, taanna oqarpoq:

- Aningaasat 8 millionit koruunit eqqartukkatit akit appasinnerulernissaannut sunniuteqassanngillat, taamaammat immikkut naalakkersuisut aningaasaliisariaqarput maannakkut akit appasinnerusumik inississappata, Jens Napãtôk oqarpoq.

Taamali aaqqiissuteqarnissaq Atassutip siulittaasuata, Aqqalu Jerimiassenip isumaqatigivallaanngilaa. Pisiassat akitsorneqarnerannut aningaasaliineq assartuinermut – RAL-imullu tuunnassappata uniffeqarnavianngitsoq taanna oqarpoq:

- Qaffaaqqikkutta taava RAL aappaagu aningaasanik amerlanerusunik piumasaqaqqissaaq. Millioninik arlalinnik amigaateqaratta ikioriartorsinnaavisigut? Taamaattoqarsinnaanngilaq. Taakku namminneerlutik pitsaanerusumik aaqqiissutissarsiortariaqarput, Aqqalu Jerimiassen oqarpoq.

Taassuma inuussutissat atortussallu assigiinngitsut akitsuutaasa peerneqarneranni nunatsinni inuuniarneq akikinnerulernissaa siunertaagaluartoq eqqaasitsissutigaa.

Taamaammat Naalakkersuisut atukkat pissanut naleqquttuusariaqarneranik isumaqaratik RAL-ip assartuinermut akinik qaffaaneranik akuersiinnarunik neriorsuutiminnik qimarratiginniinnassasut isumaqarpoq:

- RAL assartuinermik ingerlatsinermi ukiut tamaasa ajorneruleriartuinnartutut illunilu Mærskitut angitigisutulli suliniarsarisutut ippoq. Ingerlatsinermummi nunatut 100 millioninik innuttaasoqartutulli aningaasartuuteqarpoq, taanna oqarpoq, nangillunilu:

- RAL nunatsinniinnaq angalaguni immaqa pitsaanerussagaluarpoq, taarsiullugulu nunani allamiut assartuinermut ingerlatsiviannut suleqatigiinnissamik isumaqatigiissuteqarluni. Kisianni ilisimanerpara?

Tamarmik misissorneqartariaqartut

Politikerip allap RAL-ip akinik qaffaaqqinnerata ajornartorsiutaalluinnarneranik imaqartoq tassaavoq Inatsisartunut ilaasortaasimasoq, Demokraatineersoq, Justus Hansen.

KNR-ip akinik qaffaanissamut atatillugu ilanngutassiaanik Facebookikkut saqqummersitsineranit akunnerup affaa qaangiutiinnartoq taanna ilanngutassiap ataani oqaaseqarpoq.

KNR-illu akunnialuit qaangiummata sianerfigimmagu suli kamassimavoq:

- Naalakkersuisut ilummut isiginninniarlutik suliffeqarfik tamarmi iliuuseqarfigisariaqarpaat. Allaffeqarfik tamarmi piviusunngorsarneqarsinnaavoq, taanna oqarpoq, nangillunilu:

- Isorliunerusuni nunaqarfinni innuttaasunut ataasiakkaanut iliuuseqarnermik takutitsisoqarsinnaavoq. Tamannali takunngilluinnarparput, akiligassamillu ingerlatitseqqinneq ajornannginnerujussuusoq takuarput, taanna oqarpoq.

KNR-ip Justus Hansen qanoq pitsanngorsaaneq qanoq isikkoqassanersoq aperimmagu paasinartumik oqarpoq:

-  Ingerlatsiviit tamarmik misissuiffigeqqissaassagaluarpakka. Allaffeqarfik taama ittoq pisariaqartipparput, siulersuisunut ilaasortat, pisortat, uiguleriiaat tamarmik talittarfimmit tunniussisartunit taama amerlatigisariaqarpat. Tamaaviat pitsanngorsaavigalugu.