Assammik arsarneq: VM-imi tupaallatsitsinissaq Savalimmiormiut neriuutigaat
Savalimmiormiut assammik arsarnermi nuannarisallit hundredelilkkaat Tysklandip kujataani illoqarfimmi Trierimiipput Savalimmiormiut assammik arsarnermi arnat nunanut allanut unammisartut siullerpaamik VM-ip naggataarnerani peqataalersut maanna malinnaaffigiartorpaat.
Atlantikup avannaaniit peqataarngaartussat puljeqatigaat Montenegro, Spania aamma Paraguay.
Ammaalluni unamminermi pingasunngorpat tamaviaartitaassagunaqaat tassani Montenegro unammissagamikku.
- Qularutissaanngitsumik unammisassavut sakkortussaqaat. Immikkut eqqarsaatigaakka Montenegro. Misilittagartuujupput. Titarnerup killinganiittartuat tunuanilu arsartut allat marluk Champions Leaguemi katillugit 1.000-it sinnerlugit isertitsinikuupput, Savalimmiut tv-qarfianni Kringvarpimi oqaluttooqataasoq Ingi Olsen KNR-imut oqarpoq.
Tupaallatsitsineq?
Taanna nammineq Savalimmiut sinnerlugit nunanut allanut siornatigut unammisartuuvoq aamma kalaallinut angutinut nuna tamakkerlugu siornatigut sungiusaasuulluni.
Unamminerit Trierimi pisussat Savalimmiormiunut tamaviaarnartussaagaluartut arsartut ataasiakkaat pikkorissiartornerat isumallualersitsivoq.
Iligiinni tunuatungaani arsartut Danmarkimi pikkorinnerit unammineranni håndboldligami unammisartuupput isersimangaatsiartarlutik taakkunanilu Jana Mittún malunniuteqarnertut inissisimavoq. Iligiinni anføreri titarnerup killinganiittartoq Pernille Brandenborg Norgemi pikkorinnerni aamma unammisartuuvoq.
- Ilimagaara Savalimmiormiut unammisartut neriuuteqartut Montenegro qinngasaarsinnaassallugu immaqalu Spaniamut tupaallatsitsillutik, Ingi Olsen oqarpoq.
Arsartugissuseq najoqqutaralugu Savalimmiormiut Paraguayimiit kakkannerorpasipput taakkulu Amerika kujallermiut anngunniunneranni sisamaattut inissipput.
Inuiaat nuannannerat
Iligiit inissilluarnerit pingasut mellemrundemut ingerlaqqittussaammata Paraguay ajugaaffigisinnaagunikku Savalimmiormiut Stuttgartimut mellemrunderiassapput.
Savalimmiormiut VM-imi peqataaneranni illersuisui inuiattut Tysklandimi angerlarsimaffinnilu Atlantikup avannaani qeqertani nuannattoqartussaavoq.
- Unammisartuvut Savalimmiuni sungiusarnerminni illoqarfinni sungiusarfigisaminni atuarfinnut tamaginnut pulaartarput taamalu inuiaqatigiit tapersersuilluarnissaat tunngavissillugu. Ilimagaarput Savalimmiormiut 500-t missaanniittut Tysklandimi VM-erfiusumut Trierimut isiginnaariassasut, Ingi Olsen oqaluttuarpoq.
Nunanut allanut unammisartut aningaasaliisui pingaarnerit Tysklandimi aamma pisoqartitsiniarput isiginnaariat ataatsimoortutut misigitinniarlugit ilimanarporlu taakku amerlanersaat nunanut allanut unammisartut kiataannik qaqortunik kiateqarumaartut.
- Aningaasaliisartut eqeersimaartuupput. Tysklandimut isiginnaariaqatigiinnissamik aaqqissuipput Savalimmiuni assammik arsartartut kattuffiannut suliakkersuutaanngitsumik. Tysklandimi VM-ertoqarnerani aamma katerinnernik aaqqissuussissamaarput, Ingi Olsen oqarpoq.
DRip internettikkut siammarterisarfiani DR-TV-mi Savalimmiormiut unammineri malinnaaffigineqarsinnaapput. Montenegromut unammineq pingasunngornermi nalunaaqutaq nalunaaqutaq 17.20 aallartissaaq.
