Assammik arsarnermi EM: Savalimmiormiut nakimanatik unammersuarnerit naammassivaat
Qaqortunik atisalersorsimallutik nipilioqalutik Savalimmiuniit isiginnaariat Schweitzimi Baselimi timersortarfissuarmi tiqeqqoq pigisuusivaat maannalu Savalimmiormiut assammik arsarnermi EM-mi peqataaneranni naammassisumi nuannersunngortitseqataallutik.
Tusaamasarsuit soorlu Henny Reistadi Norgemeersoq aamma Helena Elver Danmarkimeersoq kakkannerpaatut inissinniarlutik ilungersorneranni Savalimmiormiut anguniagaat allami inissisimavoq.
- Peqataajartoratta soorunami pointinnannissamik neriuuteqarpugut. Aammali nalunngilarput ajornakusuussaqisoq siullerpaamik EM-mi peqataaleratta pisussallu takussornerat najoqqutaralugu ingerlaannartariaqarluta, Savalimmiormiut anføreriat Pernille Brandenborg KNR-mut oqarpoq.
- Pointinappugut naallu ingerlaqqinngikkaluarluta isumaqarpunga takutitsinerput tulluusimaarutissaasoq, Pernille Brandenborg ulluinnarni håndboldligami København Håndboldimi unammisartuusoq oqarpoq.
Aallartinneq sakkortooq
EM sioqqullugu Savalimmiormiut neriuutigaat aaqqissuisuusunut Schweitzimiunut pointinnassinnaallutik. Aallartinnermili pissanganeq akisunaarpaat isertitanik qulinik kinguaraluareerlutik nukippassuit atorlugit angummanniarsarigamik.
Iluatsingajavippaamm. Isertitanillu pingasuinnarnik ajorsareerlutik Kroatiamut iluatsitsisinnaaneq upperilerpaat.
Unammineq naammassisoq nalunaarlugu dommerit siggarmata 17-17-mik isertitsisoqarsimavoq. Savalimmiormiut arsartui teqeqqumut illersuisumik tiguarsimasaannut arpaliupput nuannaaqatigiartorlugit.
- Illersuisuvut unammersuarnermi pingaaruteqarluinnarput, Pernille Brandenborg naqissusiivoq.
- Aamma isumaqarluinnarpunga taakkuusut ajornartorsiorfitsinni nukissaqalersitsisut Schweitzimummi isertitanik qulinik kinguaraluaratta, upperilersippaalli iluatsissinnaagipput. Qujassutissaqarfigingaarpagut neriuppugullu arlaanni EM-mut annguteqqissagutta tapersersuiartoqqikkusussinnaasut, Pernille Brandenborg oqarpoq.
Siunissaq qaamavoq
Savalimmiormiut nunanut allanut unammisartui inuusoqaat. Tunuani arsartui 20-it 24-illu akornanni ukiullit Danmarkimi håndboldligami unammisaruupput. Suli inerisaqqissinnaanermut tamanna upperinnilersitseqataavoq.
- Neriuppunga upperalugulu manna aallarniutaatinnartoq, Pernille Brandenborg siunissaq pillugu isumaliutersorpoq.
- Soorunami piukkunnaatilinnut aningaasaliisarneq ingerlaannartariaqarpoq aammami malunnarpoq tamanna ingerlatiinnarneqalersaartoq. Taamaattumik upperaara suli taamatut immaqalu suli pitsaanerusumik siunissami angusaqartarsinnaasugut. Taamaattumik nunanut allanut unammisartuvut isumalluarfigeqaakka, Savalimmiormiut iligiinni ningiuat oqarpoq.
