Assammik arsarneq: Oqaluttuarisaanermut ilannguttumik savalimmiormiut peqataarngaaqqilerput

Siullermik savalimmiormiut angutitaasa assammik arsarnerup silarsua sajuppillatsippaat januarimi EM-rtoqarnerani Norgemut naligiiginnaramik.

Maanna arnartaat assammik arsarnermi pisumi angisuumi sassartssanngorput assammik arsarnermi Europami pissartanngorniunneq Schweitzimi, Østrigimi Ungarnimilu pilerpat.

Iligiinni pingaarutilik Jana Mittún misigisassamut qilanaaqaaq.

- Misigisaq annertoorujussuussaaq aamma ilimagaara ajornakusuussaqisoq tamatsinnullu nutaajulluni, taanna KNR-mut oqarpoq.

Savalimmiormiut puljeqatigivaat Schweitz, Kroatia aamma Danmark.

- Tupaallatsitsisinnaanerput pointinnassinnaanissarpullu neriuutigaarput, kisianni ajornakussuusaqaaq tamannalu ilisimaarivarput. Natsorsuuteqarpallaanngilagut sapinngisarpulli tamaat oqartarnerattullu uummativut nassarlugit arsarumaarpugut, Jana Mittún oqarpoq.

Tupaallatsitsisinnaaneq

Taanna oqarpoq tupaallatsitsineq ammaalluni Schweitzimut unamminermi pisinnaasoq. Schweitzimiut aaqqissuisuugaluarlutik nunani tamalaani misilittagakipput. Aatsaat aappassaa EM-mi peqataalerput sulilu VM-mi OL-milu peqaanikuunatik.

Angutit Tysklandimi EM-rmata tapersersuineq annertoqaaq. Allaammi Savalimmiut avataanni savalimmiormiut aatsaat taama amerlatigalutik katersuupput.

Arnat aamma EM-mut siullerpaamik anngukkiartornerminni Savalimmiuni inuiaqatigiinnit tapersersorneqarluartutut misigipput inuussutissarsiortullu tassani peqataalluarput.

- Taakkumi pissutaaqataapput assammik arsartartut kattuffiata ullumikkut inissisimalluarnermigut pikkorissunik sungiusaasoqartissinnaammatigut, Jana Mittún oqarpoq.

- Savalimmiuni suliffeqarfiit assammik arsarneq tapersersorpaat. Aamma innuttaasut tapersersuilluaqaat. Tusaamavara aamma amerlasuut Schweitzimi unammissatsinnut isiginnaariassamaartut. Aamma tapersersuisoqarluarnera aalajangiisooqataasinnaavoq, Jana Mittún, ulluinnarni Danmarkimi ligami Viborgimi unammisartuusoq oqarpoq.

Pikkorissut nutaat inerikkiartortut

Arsartut EM-qataasussat arlallit aamma Danmarkimi unammisartuupput.

- Tupannalaarsinnaavoq Danmarkimi Savalimmiunilu assammik arsarnerup assigiinnginnerat. Uannut iluaqutaannguatsiarpoq pikkorissunik sungiusaqateqartarama ullullu tamaava tamaviaartariaqartarlunga, Jana Mittún oqarpoq.

Savalimmiormiut amerlasuut ilinniagaqariartorlutik Danmarkimut nuuttarmata assammik arsarnermi pikkorissiartornissamik ilaqartarpoq. Ineriartornerup tamatuma savalimmiormiut nunanut allanut unammisartui pitsanngoriaqqitsissinnaagai arsartoq pingaarutilik isumaqarpoq.

- Iligiinni agguaqatigiisillugu 20-it sinnilaaginnarlugit ukioqarpugut. Neriunarsinnaavoq suli amerlanerit nunanut allanut assammik arsariartarumaartut. Amerlasuut aamma 22-it missaannik ukioqaleraangamik Danmarkimut ilinniagaqariartortarput. Pingaaruteqarpoq assammik arsarnermik ingerlatsiinnartarnissaat. Tamanna siunissami uatsinnut soqutiginaateqarsinnaalluarpoq, Jana Mittún naggasiivoq.

Savalimmiormiut Schweitz novemberip 29-at unammissavaat, Kroatia decemberip aallaqqaataani kiisalu Danmark decemberip pingajuani.