Savalimmiuni assammik arsarneq nuannaarutaaqisoq: Tysklandimi EM-qarnissaanut anngupput
Angisuumik anguniagassinnissamut sapiissuseqaraanni piviusunngortitsisoqarsinnaavoq.
Tamanna Savalimmiuni assammik arsarnermi nunanut allanut unammisartut misigivaat 2024-mi Europami pissartanngorniunnissamut Tysklandimi pisussamut anngukkamik.
- Ukiut qulit matuma siorna Savalimmiuni assammik arsartartut kattuffianni siunniunneqarpoq 2024-mi unammersuarnerit naggataarneqarnerannut anngukkusuttoqarluni, Savalimmiut tv-qarfianni Kringvarpimi ilisimasalittut oqaluttooqataasartoq Ingi Olsen KNR-mut oqarpoq.
- Anguniagaq taanna taamanikkut piviusorsiorpasinngilaq. Maannali paasinarsivoq pilersaarusiorluarnikkut, ukioqatigiit pikkorissut piginerisigut sungiusarluarnikkullu anguniagaq taanna anguneqarsinnaasoq, Ingi Olsen oqarpoq.
David Goliathimut
Anngunniunnermi Savalimmiormiut nunat assammik arsarnermi pissaanilissuit soorlu Rumænien aamma Ukraine ajugaaffigaat.
EM-ip naggataarneqarnissaanut pingasunngornermi ualikkut makitsisoqarpoq Savalimmiormiullu Norge, Slovenien aamma Polen puljeqatigisussanngorpaat. Tamanna Daavip Goliathimut unammillerneratut ippoq nalunarporlu Daavi Goliathimut ajugaaqqissinnaajumaarnersoq.
- Assammik arsarneq eqqarsaatigalugu puljemut ajorpallaanngitsumut pivugut, Ingi Olsen oqarpoq innersuussutigalugu nunat pissaanilissuit Frankrig, Tyskland aamma nunarsuarmi pissartat Danmarkimeersut puljeqatigisussaannginnamikkit.
Bundesligamiilissapput
Savalimmiormiut unamminerni aallarniutaasuni Berlinimi unammisassaaq apeqqutaatinnagulu ajugaaffigiuminaatsunut unammisoqartussaasoq assammik arsarnermik nuannarisallit Savalimmiuniit Tysklandimut januarimi isiginnaariakaanissamut piukkuulereerput.
- Ilimagaara tusintilikkaat timersortarfissuarnut isiginnaariarumaartut. Ilimagilluinnarpara Savalimmiuni inuiaqatigiit unikkallartassasut unamminerni aallarniutaasuni pingasuni unammisoqaleraangat, Ingi Olsen oqarpoq.
Qeqertani atlantikup avannaaniittuni assammik arsarnermi siuariartorneq ingerlaqqippoq nunanullu allanut unammisartut tamakkipajaarlutik aasap kingorna nunani allani unammisartussaapput. Allaammi unammisartut ilaat Tysklandimi qaffasinnerpaamik bundesligami iligiinni soorlu THW Kielimi aamma Füchse Berlinimi unammisartuujumaarput.
