Rina Møller Lorentzen Savalimmiuni assammik arsartalissaaq
30-nik ukiulik Rina Møller Lorentzen, assammik arsarnermi GM-mi aquttuulluarnerpaatut toqqagaasoq, assammik arsarnermi unikaallassimaareerluni akuliuteqqilluarpoq. Assammik arsarnermi kapitali nutaaq Savalimmiuni aallartittussanngorpaa.
Ukiualuit assammik arsarneq unikaallatsillugu ilinniagaqarneq salliutippaa Danmarkimi 1. divisionimi unammisartooreerluni.
- Danmarkimi unammisartooqatiginikuusara Savalimmiunut angerlarami Klaksvík-mi unammisartuuffissaminut inassutigisimavaanga, Rina Møller Lorentzen KNR-mut oqaluttuarpoq.
Rina Møller Lorentzen aquttuunermi qunoriarfeqanngitsutut ilisimaneqarpoq aammalu Danmarkimi 1. divisionimi unammisartuulluni 182 centimeterimik angissutsini atorluarlugu initusaallaqqittarpoq.
Assammik arsartartut peqatigiiffiata Stjørnanip Klaksvík-meersup Rina Møller Lorentzenip assammik arsarnermi tunulequtaa misissoqqissaareerlugu isumaqatigiissutissamut siunnersuut nassiuppaa.
- GM-mi unammisaqattaarnikka isiginnaareerlugit isumaqatigiissutissaq ilasimavaat. Assut pissanganarpoq. Taamaattumik isumaqatigiissusiornissamut akuersivunga, Rina Møller Lorentzen oqaluttuarpoq.
Periarfissaq kingulleq
Unammisartuunermi saniatigut Stjørnan-mi inuusuttuaqqani aquttuusunut sungiusaasunngussaaq.
Savalimmiunut nuunnissamini aamma unammisartutut misilittagaqarnissaq pileritsassutigivaa.
- Ilinniagaqarneq uannut salliusuaannarpoq. Oqaasilerinermi, atuakkialerinermi tusagassiutilerinermilu ukiaq bachelorinngorpunga maannalu nuannarilluakkannik misileerusullunga, Rina Møller Lorentzen oqarpoq.
- 30-nik ukioqarpunga aappaqarnagalu meeraqarnanga. Una periarfissaq assammik arsarnermi nutaanik misigisaqarnissaut uannut periarfissatut kingullertut isigivara, Rina Møller Lorentzen oqarpoq.
NÛK-mi aquttunut sungiusaasoq Isak Olsen siornatigut Savalimmiuni unammisartuusoq aamma siunnersortigilluarsimavaa.
Savalimmiuni kakkannerit Danmarkimi 1. divisionimi unammisartut angumavaat.
Aasap naalernerani Rina Møller Lorentzen Klaksvík-mut nuussaaq.
