Angut isumapiloqarluni tatiginnilersitsiniaasimasutut meeqqamillu 15-init ukiukinnerusumik pinngitsaaliilluni kujannissimasutut eqqartuussaasoq
Angut 49-nik ukiulik meeqqamik 15-init ukiukinnerusumik pinngitsaaliilluni kujannissimasutut, akiliilluni atoqateqartarsimasutut, isumapiloqarluni tatiginnilersitsiniarsimasutut assinillu atoqatigiittortaqartunik meerartalinnik tigummiarsimasutut unnerluussutit Qeqqata Eqqartuussiviani tallimanngormat eqqartuussaassutigai.
Angutip 49-nik ukiullip niviarsiaraq 14-inik ukiulik sivisuumik eqqarsaatipiloqarluni tatiginnilersinniarsimagaa arlaleriarlugulu pinngitsaalillugu kujassimagaa, eqqartuussivik naliliivoq.
Piffissaq juulimi 2024-miit apriilimi 2025-imut mittatiginniffiusimavoq, 49-nik ukiulik niviarsiaqqamut piffissami aamma tassani isumapiloqarluni tatiginnilersitsiniaasimalluni.
- Isumapiloqarluni tatiginnilersitsiniaaneq naatsumik oqaatigalugu tassaavoq, inersimasup ukioqqortunerunini misilittagaqarneruninilu atorlugit meeraq kinguaassiutigut atornerlunniassagamiuk tassunga attaveqalerniarsarisoq. Tassalu ilaatigut taamaaliorneq pillugu 49-nik ukiulik eqqartuussaavoq, unnerluussisussaatitaasuneersoq Kristian Buskov Nierhoff oqarpoq.
Angut apriilip 16-ianni 2025-mili tigummigallagaalerpoq, ukiunilu sisamani pineqaatissinneqarluni maanna eqqartuussaavoq.
Eqqartuussaasoq eqqartuussut suliareqqitassanngortissanerlugu eqqarsarfissaqaqqaarumavoq.
