IA ataatsimeersualersoq - siulittaasullu tullianut qinigassanngortittoqartoq

Nunatsinni partiit annersaat Inuit Ataqatigiit nuna tamakkerlugu ataatsimeersuarluni unnugu aallartissaaq.

Ataatsimeersuarneq Nuummi Timersortarfimmi unnugu nalunaaqutaq arfineq-marlunut aallartissaaq.

Partiip nuna tamakkerlugu ilaasortaasa partiip politikkia oqallisigissavaat siulersuisuunernullu sapaatiuppat qinersisoqassalluni.

- Qiimasoqarpoq, Sermitsiaq AG-imi politikkikkut aaqqissuisoq, Jensine Berthelsen oqarpoq. Taassuma Nuup Timersortarfiani ullumi ataatsimiinnerit malinnaaffigai.

- Ullumi ulloq sammisaqarfiuvoq, tassanilu meeqqanut inuusuttunullu tunngasut oqallisigineqarlutik. Kingortigut aalisarneq mittarfeqarfiillu oqallisigissavaat.

Inunnik isumaginninnermut politikki, Inuit Ataqatigiit qineqqusaarutigaat. Naalakkersuisoqatigiilu qinersinerup kingorna meeqqanut, inuusuttunut ilaqutariinnullu naalakkersuisoqarfimmik pilersitsipput, Múte B. Egedellu Eqaluk Høegh tassunga naalakkersuisunngortippaa.

AAMMA ATUARUK Eqaluk Høegh naalakkersuisutut tunuarpoq

Taannali uippakajaarneq pissutigalugu sulinngiffeqaliaarpoq - taannalu sapaatit akunnerisa pingasut matuma siorna naalakkersuisutut tunuarluni.

Mimi Karlsen meeqqanut, inuusuttunut ilaqutariinnullu naalakkersuisuugallarpoq. Taannalu tamatuma saniatigut isumaginninnermut suliffeqarnermullu aamma naalakkersuisuulluni.

Naalakkersuisumik aamma meeqqanut inuusuttunullu naalakkersuisoqarfimmik pilersitsinissaq qinersinerup kingorna taperserneqangaatsiaraluarpoq, pingaartumik MIO-mit meeqqat illersuisuannit, Aviâja Egede Lyngemit tapersiisoqarluni.

- Neriuuteqarfigilluinnarpara maannakkut meeqqat inuusuttut ilaqutariillu iluanni suleriaatsit ataqatigiissaarnerujussuarmik ingerlanneqalissasut. Tamanna ukiorpassuarni nilliaatiginikuusatta amigaatigisattalu ilagaat, meeqqat illersuisuat oqarpoq.

Aaja Chemnitz siulittaasumut tullersortaarusuttoq

Maanna siulittaasoq Múte B. Egede siulittaasutut sapaatiuppat qinersinissamut sassartutuaavoq. Jensine Berthelsenip oqarnera naapertorlugu tapersersuisoqangatsiarpoq.

Sapaatiuppalli siulittaasup tullianut aamma qinersisoqassaaq, folketingimimi ilaasortaq siulittaasumut tullersortaalerusuppoq.

AAMMA ATUARUK Inuit Ataqatigiit ataatsimeersuarnissaat kinguartinneqartoq

- Nuannarineqarluartoq Aaja Chemnitz Larsen siulittaasup tullianut sassartoq ilisimavarput, Jensine Berthelsen oqarpoq.

- Agathe Fontain maanna siulittaasup tulliatut atuuppoq, taanna tullersortaaginnarusuppoq, taamaammat unammisoqartussaassaaq.

Qanorli ingerlasoqarpoq

Inuit Ataqatigiit nuna tamakkerlugu politikkertik, kommuninullu atatillugu anguniakkatik aqagu arfininngornermi eqqartussavaat.

Peqqinnissaqarfimmiit mittarfiliortiternernut tunngasut oqallisigineqassapput, akileraartarnermut aaqqissuusseqqinneq oqallisigineqartussanut aamma ilaavoq. Inuit Ataqatigiimmi inuiaqatigiinni assigiimmik akileraartitsisarunnaarusupput. Tassungalu taarsiullugu akissarsiaqarnerusut akileraarnerusassapput akissarsiakinnerusullu nunatta karsianut annikinnerusumik akiliisassallutik.

Jensine Berthelsenilli qilanaarinerpaasaa tassaavoq naalakkersuisoqatigiinni suleqatigiinnermik naliliineq:

- Partiip naalakkersuisoqatigiit pilersinneqarneranit qaammatit siulliit nammineq qanoq naliliiffiginiarnerai pissangaginerpaavara. IA Nalerarlu suleqatigiinnerluppat? Naalakkersuisoqatigiilluunniit ilorrisimaarutigaat?, Jensine Berthelsen oqarpoq.