Assi: Meeqqagut utaqqikatapput

Eqaluk Høegh naalakkersuisutut tunuarpoq

Eqaluk Høegh naalakkersuisunit ilaasortaanerminit tunuarpoq.

Eqaluk Høegh (IA) naalakkersuisutut tunuarpoq.

Taama Facebookimi allappoq.

- Naalakkersuisut siulittaasuat oqaloqatigereerlugu Naalakkersuisutut tunuarnissara kissaatigigakku inuttaanut tamanna qinnutigivara, Eqaluk Høegh, Facebookimi quppernermini tallimanngornerup ualinerani nal. 15.30 taama nalunaaruteqarpoq.

- Piffissami sivitsortumi inuttut peqqissutsinnik unammilligassaqarnera ammasumik saqqummiunnikuuara. Qaangerniarneranilu ilorraap tungaanut saakkaluarsimallunga, piffissami kingullermi nassuerutigisariaqarpara peqqissutsikkut killiffiga akisussaaffimmillu tigumminninnera ataatsikkoortissinnaanagit. Peqqissuserami salliuttariaqarpara, Eqaluk Høegh tunuarnerminut taama tunngavilersuuteqarluni allappoq.

Eqaluk Høegh uippakajaarnermik eqqugaalluni sulinngiffeqarnikuuvoq. Tamanna juunimi pivoq ilaqutariinnut aamma inatsisit atuutsitsinneqarnerannut naalakkersuisutut ivertinneqarneranit qaammatialuinnaat qaangiuttut.

Tamatuma kingorna inatsisit atuutsitsinneqarnerannut naalakkersuisoqarfimmut tunngasut Naaja Nathanielsenip, ineqarnermut, attaveqaasersuutinut, aatsitassanut, naligiisitaanermullu naalakkersuisooreersup, akisussaaffigilerpai.

Eqaluk Høegh uippakajaarnermik eqqugaalluni sulinngiffeqareernermi kingorna ilaqutariinnermut naalakkersuisutut atuuffeqaleraluarpoq - maannali tassa tunuarpoq.

KNR-imit Eqaluk Høegh oqaaseqartinniarlugu pissarsiariniaraluarparput - iluatsinnaguli.

 

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl