Isorniunerusuni inummut ilanngaat qaffanneqarpat, tamakkunani sulisussarsiornermut iluaqutaassasoq, Avannaata Kommuniani Siumut isumaqarpoq. IA-lli taamaaliornissaq annerusumik aaqqinissamut ilaannaartut isigaa.Assi: KNR

IA-p akileraarutinik isorliunerusuni appaanissaq taperserpaa - allanilli aamma iliuuseqaqqusilluni

Isorliunerusuni inummut ilanngaat anginerusoq sulisussarsiornermut iluaqutaassasoq, IA isumaqarpoq. Kisianni taamaaliorneq akileraartarneq pillugu aaqqissuusseqinnermi annerusumi ilaassaaq.

Isorliunerusuni sulisussaqarumagaanni allaanerulluinnartumik iliornissaq pisariaqarpoq - soorlu assersuutigalugu inuit sulisut aningaasarsiamik ilaat amerlanerusut tigusarniassammatigit ,inummut ilanngaatip qaffanneratigut.

Avannaata Kommuniani Inuit Ataqatigiit Siumullu tamanna isumaqatigiissutigisinnaavaat.  

- Taanna pissanganartorujussuuvoq, taamatut oqaatigisariaqarpara, IA sinnerlugu Avannaata Kommuniata kommunalbestyrelsiani ilaasortaq, Bendt B. Kristiansen, oqarpoq.

AAMMA ATUARUK Borgmesteri siunnersuuteqartoq: Isorliunerusuniittut akileraarnikinnerusalerlik

Inuit isorliunerusuni sulisut tamarmik inummut ilanngaataasa ikinnerpaamik 3-4000 koruuninik amerlineqarnissaannik, Avannaata Kommuniani borgmesteri, Siumumeersoq Palle Jeremiassen, siunnersuuteqartuuvoq.

Avannaata Kommuniani meeqqat inuusuttullu ikiortariallit angerlarsimaffiullu avataanut inissitat atugaat aammaartumik Namminersorlutik Oqartussat Nakkutilliinermik Ingerlatsiviata nalunaarusiaani isornartorsiorneqarujussuarmata taama siunnersuuteqarpoq. Inunnillu isumaginninnermi ilaatigut Upernavimmi sulisussaaleqineq kommunip tunngaviatigut ajornartorsiutiginerpaasaanut ilaasoq, Palle Jeremiassen nassuiaavoq.

Siunnersuut Siumup siulittaasuata, Erik Jensenip, soqutiginartutut taavaa. Inummulli ilanngaatip qanoq kinguneqassanerani missingersuutinik takoqqaarusuppoq, aammali borgmesteriulerumaartullu qinersinerup kingorna oqaloqatigiissutiginissaa piareersimaffigalugu.

Aaqqiinimernit iluaqutaanngillat

Inummulli ilanngaammik qaffaanikkut akileraarnikinnerulerneq pimoorussinerunngitsoq, Bendt B. Kristiansen isumaqarpoq,

- Inummut ilanngaatiinnakkut isumaginnginnermi ajornartorsiutigut aaqqiivigisinnaanngilagit, taanna oqarpoq aappaaguatigut takussaasumik sunniuteqassanngitsoq, inummulli ilanngaatikkut iluarsiisinnaassagutta, ukiut arlallit qaangiuppata aatsaat sunniuteqalissasoq, oqarluni.

Bendt B. Kristiansen kommunalbestyrelsinut 2005-imili ilaasortaavoq, isumaginninnermillu nakkutilliartornernit nalunaarusiarpassuarnik takusarsimalluni. Taamaaligaangat politikerit sunniuteqangaanngitsumik sukkut tamaana iluarseeriartartut takusarpai.

AAMMA ATUARUK Avannaata Kommunianut isornartorsiuterujussuit: Ataatsimik ukiulik gonorrértoq

Politikerit taamaammat tamakkiinerusumik eqqarsartariaqartut, taanna isumaqarpoq. Assersuutigalugu sulisut suliaqarfimmik kisimiillutik suliaqartussaajunnaarsillugit aaqqissuuteqqinnerisigut. Taava kommunip sulisuni aamma pitsaanerujussuarmik atugaqartittariaqarpai.

- Apeqqutaalluinnalersarmat angerlarsimaffik, angerlarsimaffigiumaakkat, iseruit imeqarnersoq kuuinnartumik; kuutsittakkamik anartarfeqarnersoq.

Borgmester Palle Jeremiassenip ineqarneq, peqqinnissamut atortorissaarutit sunngiffimmilu neqeroorutit Avannaata kommuniani allanilumi sulisussarsiornermi pingaaruteqartut aamma nassuerutigaa.

IA: Akileraartarnermi angisuumik iluarsaaqqinnissaq pisariaqarpoq

Inummut ilanngaat qaffanneqassappat, tamanna Inatsisartunit, nunatsinni akileraartarnermut akisussaasuusunit, aalajangersarneqartariaqarpoq.

AAMMA ATUARUK Inuit Ataqatigiit ukiuni qulikkuutaani akileraartarnermut politikkertik qimakkiartoraat

IA-lli isumaa naapertorlugu inummut ilanngaammik qaffaaneq akileraartarnermik iluarsaaqqinnermut, IA-p qinersivimmi aggersumi piviusunngortikkumasaanut, ilaaginnassaaq.

- Aaqqissuuteqassagaanni akileraartarnermi tunngaviusumik aaqqissuusseqqittoqartariaqarpoq, ilaatigut ineqarnermut tapiissuteqartarnermut tunngasut pisortat - tapiisarnerannut tunngasut - tamaasa ilanngullugit aaqqissuuteqqinngikkaanni ataqatigiinngitsumik aaqqiisoqassammat, Bendt B. Kristiansen oqarpoq.

IA 1978-imi pilersinneqarmalli, partiip aningaasarsiaqarnerusut akileraarnerusarnissaannik siunertaqarpoq.

Inuit Ataqatigiit amerlanerussusiisinnaasunik isumaqatissarsinngisaannarpoq. 

Isummersuutit