Borgmesteri siunnersuuteqartoq: Isorliunerusuniittut akileraarnikinnerusalerlik
![](/sites/default/files/styles/image_934x467/public/article_images/bygder_0.jpg?itok=88nAbCQY)
Isorliunerusuni isumaginninnermi siunnersortissaaleqineq, pisiniarfimmiussaaleqineq sanasussaaleqinerlu anigorumallugit aaqqissuusseqqittariaqarpugut.
Avannaata Kommuniata borgmesteria, Palle Jeremiassen (S), taama isumaqarpoq.
Taassumammi Inatsisartut isorliunerusuni inummut ilanngaammik qinigaaffiulertussami qaffaangaatsiaqquai.
- Sumiluunniit ilinniarsimasussaaleqivugut. Nunali tamakkerlugu iliuuseqarfigisinnavaarput: Norgemi aaqqissuussineq qiviarutsigu, sulisut aningaasarsiaqarnerunerannik kinguneqartumik Norgemi avannarparteriartortilluni inummut ilanngaat qaffasinneruleriartortarpoq, taanna KNR-imut oqarpoq.
Avannaata Kommuniani meeqqat inuusuttullu ikiortariallit angerlarsimaffiullu avataanut inissitat atugaat aammaartumik Namminersorlutik Oqartussat nalunaarusiaanni isornartorsiorneqarujussuartut, KNR-ip sapaatit akunneranni uani nutaarsiassiaraa. Inunnillu isumaginninnermi sulisussaaleqineq kommunip tunngaviatigut ajornartorsiutiginerpaasaanut ilaasoq, Palle Jeremiassen nassuiaavoq.
Akileraarnikinneruneq ilinniarnermilu taarsigassarsianut naafferaanikinneruneq
Norgemi aaqqissuussineq Avannaata Kommuniata borgmesteriata innersuussutigisaa tassaavoq, 'Finnmarksfradrag'. Aaqqissuussineq taanna Norgep avannarpasinnerusortaani nunap immikkoortuini, Nordtromsimi Finnmarkimilu inuit malunnartumik akileraarnikinnerusarnerannut peqqutaavoq.
Nunap immikkoortuini taakkunani inummut ilanngaat nalinginnaasup saniatigut inuup ataatsip akileraarusigassaanut 2021-mi ukiumut 15.500 koruuniupput. Nunallu immikkoortuini taakkunani akileraarut 18,5 procentiuvoq, Norgellu sinnerani akileraarut 22 procentiulluni.
Norgemilu ilinniarsimasunngorlaat nunap immikkoortuini taakkunani ikinnerpaamik qaammatini aqqaneq-marlunni kipisuitsumik najugaqarsimasut, iIlinniarnermi taarsiagassarsianut ukiumut 10 procentimik, tassa amerlanerpaamik 25.000 koruuninik naafferakinnerusinnaasarput.
Aningaasarsiat pillugit assersuutit
Isumaginninnermi siunnersortitut ilinniarsimasutut:
Suliamik ingerlatsisoq: Ilinniarsimasunngorlaaq akileraartigani tunngaviusumik 23.3795,09 koruunisisarpoq. Ukiut sisamat kingorna akileraartigani tunngaviusumik 25.202.52 koruunisisarpoq
Isumaginninnermi siunnersorti: Ilinniarsimasunngorlaaq akileraartigani tunngaviusumik 25.467,77 koruunisisarpoq. Ukiut 7-8 kingorna akileraartigani tunngaviusumik 26.846,91 koruunisisarpoq
Meeqqat atuarfianni ilinniartitsisutut ilinniarsimasut
Ilinniarsimasunngorlaaq: Akileraartigani tunngaviusumik 23.931.89 koruunisisarpoq
Ukiut arfineq-pingasut kingorna: akileraartigani tunngaviusumik 30.513,16 koruunisisarpoq
Tusarfiit: IMAK, AK
Tunngaviusumilli atuarfinni ilinniartitsisut ilinniarnermi taarsiagassarsianut tamatuma saniatigut ukiumut 20.000 norskit koruuniinik naafferakinnerusarput.
Tamanna nunap immikkoortuini taakkunani innuttaasut amerlassusaasa ukiunit 25-nit ikinnerunngitsuni aalaakkaanerannut qulakkeerutaaqataavoq.
Ingammillu inummut ilanngaateqarnerutitsineq isorliunerusunut suliffissarsiortoqarnerusalerneranik kinguneqarsinnaasoq, borgmesteri Siumumeersoq naliliivoq.
- Isorliunerusunut suliartorneq aningaasarsiatigut iluaqutitaqalerpat, tamanna kommunitsinut iluaqutaaginnarani nunali tamakkerlugu iluaqutaassaaq, Palle Jeremiassen oqarpoq.
Qaammatikkaartumik inummut ilanngaat ikinnerpaamik 3-4.000 koruuninik qaffattariaqartoq
Qaammatikkaartumik inummut ilanngaat ikinnerpaamik 3-4.000 koruuninik amerlanerusunilluunniit qaffanneqartariaqartoq, Jeremiassen oqarpoq.
Assersuutigalugum Avannaani inuuniarneq Nuummi inuuniarnermit akisuneruvoq, angallannerlu tamatuma sianiatigut aamma aningaasartuutaalluni.
Isorliunerusormiullumi ilinniareernerminni angerlaqqittartut amerlagisassaanngillat, Palle Jeremiassen oqarpoq.
- Allaat isumaginninnermik ilinniarsimasut ilaat Upernavimmiuugaluarlutik uterusuttanngillat. Ilaatigut aningaasarsiat, ineqarneq, anartarfeqarneq, eqqaaveqarneq sunngiffimmilu sammisassaqartitsineq peqqutigalugit, taanna oqarpoq.
AAMMA ATUARUK Avannaata Kommunianut isornartorsiuterujussuit: Ataatsimik ukiulik gonorrértoq
Ilinniartitsisut Meeqqat Atuarfianneersut Kattuaffiata, IMAK-ip aaqqissuussaa, Tunumi Upernavimmi nunaqarfiinilu ilinniartitsisut akileraartigatik 60.000 koruuninik ukiuni pingasuni immikkut ileqqaagaqarnissaannik qulakkeerutaavoq. Tamatumalu saniatigut nunatsinni nunaqarfinni ilinniartitsisut ineqarnermut akiliutikinnerunissaannut aamma aaqqissuussaqarpoq.
Aningaasarsiaqanerulernissaat akileraarnikinnerusalernissaalli, Palle Jeremiassenip siunnersuutigaa. Tamannalu kommunip nunattalu karsiannut nakkartut ikinnerulernerannik kinguneqaqqaariarluni siunissami sipaarniuteqarluarfiussasoq, taanna isumaqarpoq. Kommunimi suliai isumaginninnermut tunngasut imaaginnavileraangamik, pisortat inunnik isumaginninnermut aningaasartuuteqarnerulersarput.
Taamaammat nutaamik eqqartarsartariaqartugut, taanna isumaqarpoq.
- Aaqqissuussineritoqqat ukiuni kingullerni 20-ni pissutsinik sunnguamilluunniit allannguinikuunngillat. Tamanna nassuerutigisariaqarparput.