Avannaata Kommunianut isornartorsiuterujussuit: Ataatsimik ukiulik gonorrértoq
Sinilluassagaanni Isumaginninnermut, Ilaqutariinnut Inatsisinullu Atuutitsinermut Naalakkersuisoqarfiup, Nakkutilliinermik Ingerlatsiviata Avannaata Kommuniata meeqqanik tapersersuinermut tunngassuteqartuni ingerlatsinera pillugu nalunaarusiaa atuagassaanngilaq.
Tassanimi meeqqat qimaanakkat kinguaassiutitigullu atornerluinerujussuit amiilaarnaanartut atuarneqarsinnaapput.
Tassani meeqqat angerlarsimaffiup avataanut inissineqarsimasut, angajoqqaarsiat meeqqallu angerlasimaffimmini immikkut tapersersorneqarnissaminnut pisariaqartitsisut pillugit qaammat ataaseq septemberimiit oktoberimut nakkutilliisoqarpoq.
Upernaviup Ilulissallu ingerlatsivianni piffissami septemberip sisamaanniit oktoberip qulingiluaata tungaanut 2020-mi Nakkutilliinermik Ingerlatsivik misissuiartorpoq.
Kommunimi pisortaaneq, Ilaqutareeqqarnermut Ingerlatsivimmi pisortaq, sulianut pisortaq kiisalu Ilulissani suliaqarnermut ataqatigiissaarisoq, kiisalu Ilulissani Upernavimmilu suleqatigiinni pisortaq, innuttaasunik ingerlatsivimmi pisortaq aamma immikkoortortaqarfimmi pisortaq ilaatigut oqaloqatigineqarput.
Kiisalu Ilulissani Upernavimmilu kommunip suleqatigisaanik arlalinnik, peqqinnissaqarfimmik, politiinik, illoqarfinni taakkunani atuarfeqarfinnik kiisalu Upernavimmi atuartut angerlarsimaffianik Nakkutilliinermik Ingerlatsivik oqaloqateqarpoq.
Tusarfik: "Nakkutilliinermit nalunaarusiaq - Ilulissani Upernavimmilu meeqqanik tapersersuinermut tunngassuteqartuni malittarisassanik Avannaata Kommuniata ingerlatsinera pillugu nalunaarutigereerlugu nakkutilliiartorneq. Septembari - oktoberi 2020"
Upernavimmi ajortoqarluinnarpoq, Nakkutilliinermik Ingerlatsivimmik tassani meeqqanut angajoqqaarsiaqarnermullu tunngasunik suliassiissutaasimasunik 21-nik taamungaannaq tigusilluni misissuisimavoq.
Suliassiissutit taakku tamarmik 'ernumanaqaat', meeraaqqanik kinguaassiutitigut kannguttaatsuliortoqartarsimaneranut suliassiissutigineqartarsimasut amerlavallaarneri pineqarnerat pissutigalugu.
Upernavik: Kinguaassiutitigut napaatit akuersissutillu amigaataasut
Suliat marluk 'ernumanaqisutut' nalilerneqarput.
Nukappiaqqap inoorlaap, ataatsimik ukiulimmik kinguaassiutitigut nappaamik gonorrértumik aleqallip, inissinneqarneranut suliamut tunngasuuvoq. Nappaat kinguaassiutitigut atoqaternermi tunilllaattartuuvoq. Meeqqat taakku marluk angajoqqaarsiaqartinneqareerlutik angajoqqaavinut utertinneqajaarput.
Suliaq alla 'sumiginnaanerujussuarmut' tunngavoq, suliaq suli qulaajaaffigineqarluanngitsoq meeraq angajoqqaaminut angerlartitaaqqittoq, suliarlu malitseqartinneqarsimanani.
Ilaqutariittut paarsisut arfineq-pingasut Nakkutilliinermik Ingerlatsiviup Upernavimmi misissuinerani ilaasut akuersissuteqanngillat. Suliani arfineq-pingasuusuni taakkunani angerlarsimaffiup avataani inissiinerni ataasiinnaq aalajangiifigineqarsimasuuvoq, taannali tunngavilersorneqarnani.
Ilulissaani suliat 20-t taamungannaq tigusaasut misissorneqarput. Taakkunani suliani pingasut 'misissoqqitassanngorput'.
Meeqqat ukiorpassuarni akisussaasuusortaqanngitsut
Upernavimmi Ilulissanilu meerarpassuit akisussaasuusortaqanngitsut nalunaarusiami aamma erserpoq, tassa inersimasumik meeqqamut akisussaasoqanngilaq.
Suliani pineqartut tassaapput angajoqqaat tamarmik peerussimappata imaluunnniit anaanaasoq peerussimappat ataataasorlu ilisimaneqanngippat imaluunniit angajoqqaatut akisussaasuusoqanngippat.
AAMMA ATUARUK Suleqatigiissitsisut inuit salliutikkaat: - Namminersulivinneq, aalisarneq aatsitassallu kisiisa salliuppaat
Suliat ilaanni ukioq manna 18-liisussaq 2009-mili arnaa toqummat meeqqamut angajoqqaatut akisussaassusuliisoqarsimanngilaq.
Suliami allami meeraq inunngoreersoq ukiumi tassani arnaa toquvoq. Meeraq ullumikkut qulingiluanik ukioqarluni suli angajoqqaatut akisussaasuusoqanngilaq.
Tamatuma saniatigut pinngitsaaliisimanernut kinguaassiutitigullu kannguttaatsuliorsimanernut, ingammik nunaqarfinniit ilaatigut Kullorsuarniit, kommunimut suliassiissuterpassuaqarpoq. Nunaqarfinnullu angalaniarneq ajornartaqimmat nunaqarfimmiut 'sumiginnarneqartut', Nakkutilliinermik Ingerlatsivik naliliivoq.
Upernavimmi meeqqat qanoq amerlatigisut angerlarsimaffiup avataanut inissinneqarsimanersut Nakkutilliinermik Ingerlatsiviup qulakkeersinaasimanngilaa. Ilulissanili meeqqat 81-t angerlarsimaffiup avataanut inissinneqarsimasut paasineqarpoq.
Isumaginninnermut siunnersortit qimarrapput
Ilulissani Upernavimmilu ingerlatsinermi pissutsit arlaqartut Nakkutilliinermik Ingerlatsivimmiit isornartorsiorneqarujussuarput, ilaatigut ukuusut:
- Qitisumik ingerlatsivik Ilulissaaniittoq Upernavimmi ingerlatsivimmut sumiginnaavoq, ingerlatsiviit suleqatigiinnerlummata.
- Sulianik ingerlatsisut ilinniarsimanngitsut amerlavallaarput. Sulinermi 'tatisaasoqaanartarpoq' malitseqartitsisoqarnerlu ajorluni il.il. Upernavimmi isumaginninnermut siunnersortit sivisunerpaamik ukiut marluinnaat sulisarput.
- Sulianut amerlanerpaanut tunngatillugu uppernarsaatinik amigaateqarneq. Aalajangiinerit, tunngavilersuutit, allattuisussaatitaanerit allakkanillu kakkiussisarnerit amigaatigineqartarlutik.
- Angajoqqaarsianik meeqqanillu angerlarsimaffiup avataanut inissinneqartunik nakkutilliisoqanngilaq.
- Meeqqanik oqaloqateqartoqarneq ajorlunilu illersuisoqanngilaq.
- Meeqqat pillugit kommunimi politikkeqanngilaq.
Ilulissani Upernavimmilu ingerlatsiviit tamarmik politiinik, atuarfeqarfinnik peqqinnissaqarfinnilu suleqateqarluarnera nalunaarusiami ajunngitsutuaavoq.
Nakkutilliinermik Ingerlatsivik aaqqiissutissanik 28-nik innersuussivoq. Avannaata Kommuniali siullermeerluni taaama aatsaat saaffigineqalinngilaq.
Upernaviup ingerlatsiviani "kommunip inatsit malillugit suliassarititaasut kivissinnaanngikkai", Nakkutilliinermik Ingerlatsivik 2018-mi misissuereernermi naliliivoq.
