Suleqatigiissitsisut inuit salliutikkaat: - Namminersulivinneq, aalisarneq aatsitassallu kisiisa salliuppaat

 - Meerartavut inuusuttortavullu ikiortariallit paarilluinnartariaqarpagut. Suliassamik allamik pingaarnerusoqanngilaq. Taakkumi siunissami kivitsisussaraavut. Siunissami ilinniartoralutigillu atugarissaarnissatsinnut tunngaviliisussaapput.

Suleqatigiissitsisut siulittaasuat, Tillie Martinussen, taama oqarpoq. Taanna parteeqatinilu arfineq-pingasuullutik Inatsisartunut qinigassanngortipput.

Pisortat meeqqat ataasiakkaat pillugit saaffiginnissutit kalerriutillu apuunneqarneranniit ullut unnuallu marluk qaangiutsinnagit suliarilertortariaqaraat, Suleqatigiissitsisut siulittaasuat nassuiaavoq. Taava ajornartorsiummik misissuineq aallarteriissaaq.

AAMMA ATUARUK Suleqatigiissitsisut kommunimut qinigassanngortitsinngitsut

Tamanna pisortat innersuusseriaasiannik aamma pitsanngorsaanikkut angajoqqaanillu siunnersuilluarnerunikkut pissaaq. 

- Akisussaaq, taamaaliunngikkuttali akisunerussalluni. Tamannalu nunatsinni suliffeqarfeqarfinnut ullutsinni akisuvoq. Ukiuni kingullerni 20-40-ni meerartavut inuusuttortavullu ikiortariallit isumagisimasariaqaraluarpavut. Taakkumi ullutsinni suli ikiortariaqarlutik meeqqiorput, taanna oqarpoq itisiliillunilu: 

- Taamaanneratigut nunatsinni pissakitsunik, ikiortariaqartunik ilinniarsimanngitsunillu ilaqutariiaaqarpoq. Taakkua persuttaattarnermik ajornartorsiuteqartuarsinnarlutillu qitornatik kinguaassiuutitigut atornerlunneqarsinnaanerannut ulorianartorsiortittarpaat. Taamaattumik iliuuseqarfigisariaqakkat arlaqarput, Tille Martinussen oqarpoq. 

Ilinniagaqarneq imminut pilersornissamut aqqutaavoq

Atuarfeqarneq pitsanngorsagassaqarfiusut ilagilluinnaraat tamannalu isumaginninnikkut siusinaartumik suliniuteqartalernikkut iliuuseqarfigineqarsinnaasoq, Suleqatigiissitsisut oqarput. 

Taamaammat Majorianut aningaasaliissutit atuarfeqarnermi isumaginninnikkut suliniutinut ilinniartitsisunilluunniit pikkorissartitsinermut iluaqutissatut aningaasaliissutaasariaqartut, Tille Martinussen isumaqarpoq.

AAMMA ATUARUK Suleqatigiissitsisuni upernaaq eqqissiviilliortoqareersoq: Partiimi nukiit politikkimut maanna atorneqassapput

Unammilligassaqarpormi. Nunatsinni inuusuttut 52-62 procentiisa missaat atuarunnaarnerminniit ukiuni siullerni marlunni sulerineq ajortut, taanna erseqqissaavoq. Tamanna inooqataanikkut sulinikkullu ajornartorsiuteqarnerannik peqquteqartartoq, Tillie Martinussen oqarpoq.   

- Majoriamut aningaasaliissutit atuarfeqarnermut aningaasaliissutaalertariaqarlutillu tassani sulisut taakkulu piginnaasaat atuarfeqarnermi ikorfartuutaalertariaqarput. Atuarfeqarnermi pitsanngorsaaneq suliassatsinni pingaarnerpaavoq. Ilinniagaqarneq meeqqat inuusuttullu imminut taamaallutik qaqugukkuuugaluartukkulluunnit pilersulernissaannik qulakkeerinissamut aqqutissatuaavoq, Tillie Martinussen oqarpoq.

Aningaasarsiaqarnerusariaqartut

Nunatsinni kinguaariit tulliit ulluunerani paaqqinnittarfinni aallartilluarlutillu atualernissamut ikaarsaarluarsinnaaqqulllugit, perorsaasut ulluunerani paaqqinnittarfiit perorsaasussaalatsisarnerisa ajornartorsiutaajunnaarnissaanut aningaasarsiaqarnerulertariaqartut, Suleqatigiissitsisut siulittaasuat oqarpoq.

Danmarkimi ulluunerani paaqqinnittarfinni perorsaasut akileraartigatik agguaqatigiisillugu 30.200 koruunisiaqarput.

Nunatsinni ulluunerani paaqqinnittarfinni perorsaasut apriilip aallaqqaataani isumaqatigiissutitaaq naapertorlugu akileraartigatik 23.000 koruunisiaqarput. Tamanna allanngortittariaqartoq, Tillie Martinussen isumaqarpoq.

- Meeqqap ilaquttami avataanni inunnut allanut akuujartulernera ulluunerani paaqqinnittarfimmi aallartitarpoq. Tamatumalu iluatsilluinnarnissaa ilungersuunniarutsigu isumaginninnermi perorsaasut perorsaasullu malunnartumik aningaasarsiaqarnerulernissaat pingaaruteqarpoq.

AAMMA ATUARUK Atassutip Suleqatigiissitsisullu Inatsisartunut qinigassanngortitaat

- Tamannarpiaq Inatsisartuni kingullermik ataatsimiinnitsinni oqallisigaarput. Nunatsinni perorsaasut assersuutigalugu Skandinaviami perorsaasutulli aningaasarsiaqalissappata ukiumut 8-15 millionit koruunit missaannik naleqassaaq, taanna oqarpoq.

Taamaammat nunatta suliassaqarfiini danskinit akisussaaffigineqarsimasuni unammilligassat imaaginnavittut, Suleqatigiissitsisut siulittaasuat oqarpoq. Inuiaqatigiillu aningaasartuuteqarnerulernerannik kinguneqassammat akisussaaffigiligassat amerlerusunngikkitik, Suleqatigiissitsisut siulittaasuat erseqqissaavoq.

- Aningaasaatigeriikkavut suliassareriikkatsinnut isumatusaartumik atussapput. Tassami isumaginninnermi, ilinniartitaanermi peqqinnissaqarfimmilu anguniakkavut suli piviusunngortinngilavut.

Aningaasaliiffigisassani pingaarnerpaaq

Taamaammat meeqqanik inuusuttunillu isumaginninneq nunatsinni aningaasaliiffigisassani pingaarnerpaasariaqartoq, taanna aamma isumaqarpoq.

 - Namminersulivinneq, aalisarneq aatsitassallu kisiisa salliuppaat. Pingaaruteqarpullumi, pingaaruteqartunili kisiartaanngillat. Inunnik isumaginninneq pingaarnerusariaqarpoq. Suleqatigiissitsisunilumi taamaaliorpugut, taanna oqarpoq.

Imaanngilarmi inuusuttut mittarfissualiornikkut Greenland Mineralsilluunniit Narsap eqqaani aatsitassarsiulerneratigut ilinniarnerulissasut, Tillie Martinussen oqarpoq.

AAMMA ATUARUK Suleqatigiisitsisut ataatsimeersuarnerat: Tillie siulittaasutut qinigaavoq

- Paarlattuanilli pinngortitaq mingutsillugulu mittarfissualiornernut akisoqisunut imminut akilersinnaanngippata akissaaruterataannaavugut.

 - Taamaammat kinguaariit tullii imminut pilersorsinnaaqqullugit ilaquttaminnullu pilersuisinnaaqqullugit inunnik isumaginninneq nunatsinni aningaasaliiffigisassani qularnaalluinnartutuaavoq. Allanimmi pingaarnerusoqarsinnaanngilaq.