Suleqatigiissitsisut kommunimut qinigassanngortitsinngitsut
Taamaammat Suleqatigiissitsisut kommunimut apriilip ulluisa arfernanni qinigassanngortittut allattorsimaffianniinnavianngillat.
Partiimmi ullormi ataatsimi qinersisoqartussaanera pissutigalugu nukissani tamamrik Inatsisartunut qinersinissamut atorniarlugit aalajangerpaa. Tamanna partiip qineqqusaarnissanut marlunnut pisariaqartunik isumalluutissaqannginneranik pissuteqarpoq. Partiip siulersuisuunerani aningaasalerisoq ilaasortarlu, Kim Lyberth oqarpoq.
AAMMA ATUARUK Siumut vil udskyde afklaring om Kuannersuit til efter valget
- Partiiarannguuvugut, arlariinnillu qinigaaffeqarnissaq akuersaanngilarput, taamaammat matumani pingarnersiueqqissaartariaqarsimavugut, pikkoriffiginerusatsitullu isigisatsinnik ukkatarinnissuugut, taanna oqarpoq.
Partiimit kommunimut qinigassanngortittoqarusukkaluarnersoq apeqqummut Kim Lyberth ima akivoq:
- Inatsisartunut qinersinissaq ukkatarissallugu aalajangerpugut, taamaammat kommunimut qinigassanngortikkusuttoqaraluarnersoq misissunngilarput, tamatumunngami akissaqanngilagut.
Ikerinnakkut qinersineq
Taassuma Inatsisartuni politikkikkut pisut, ikerinnakkut qinersisoqarnissaanik amerlanerussuteqartoqarneranik kinguneqartut Inatsisartunullu qinersineq ullormi kommunimut qinersisoqarnerani pisussanngornera pakatsissutigaa.
- Qinersinissap tungaanut attanneqarsinnaasumik politikkeqaannarsimasinnaagaluarput, taamaakkaluarpallu kommunimut qinersinissaq ukkatariinnarsimasinnaagaluarparput.
- Kisianni tamarmik ataatsikkuussasut aalajangerput, tamannalu partiinut minnernut, partiitut annertulli aningaasaaateqartiginngitsunut, eqquivoq, Kim Lyberth oqarpoq..
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Partiip kommunimut qineqqusaartitsinani Inatsisartunut qineqqusaarnissamik aalajangiinera Suleqatigiissitsisuni aalassassimaartoqarnikuuneranik pissuteqanngilluinnartoq taassuma erseqqissaatigaa.
- Politikkikut pingaarnersiuinerulluinnarpoq, Kim Lyberth oqarpoq.
Suleqatigiissitsisut Inatsisartunut ataasiinnarmik ilaasortaateqarput – taannalu tassaalluni Tillie Martinussen.
Partiimut tapiissutit akerleriissutaanerat
Suleqatigiissitsisuni partiimut tapiissutit qanoq atorneqarnissaat novembarimi isumaqatigiinngissutigineqalerpoq.
Siulittaasup, Tillie Martinussenip siulersuisuunerillu partiip aningaasaataanik Tillie Martinussenip nammineq aningaasartuutaanut akiliutitut atornerluisoqarsimanerarneqarnera eqqunngitsuunerarpaat.
AAMMA ATUARUK Suleqatigiissitsisut siulersuisuuneri politiinut unnerluutigineqartut
Partiip aningaasaataanik qanoq atuinissap isumaqatigiinngissutigineqarnerata saniatigut partiiaqqami kina siulittaasuunersoq ammasumik aamma isumaqatigiinngissutaavoq.
Partiilli siulersuisuisa Tillie Martinussenip maanna siulittaasuugallartoq taperserpaat.
Tamatuma saniatigut partiimi ilaasortat tallimat nuna tamakkerlugu decembarimi ataatsimiittoqarnerata siornatigut tunuartinneqarput. Partiip siulersuisuuneri ilaasortanit taakkunannga tallimanit politiinut novembarimi unnerluutigineqarput.
