Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Siulittaasuugallartup Tillie Martinussenip sapigaqarluni anillattoorneranut Nuummi Laserklinikimi suliaritinneranut 3.654 koruunit.
Partiip sulisuisa uippakajaarnermi ikiorserneqarnerannut 50.000 koruunit.
Oqarasuaammut angallattakkamut 2020-mi immiinermut 25.500 koruunit.
Tillie Martinussenip nutserneranut 14.000 koruunit.
Tamakkua tamarmik partiip akilerpai, taakkualu katillugit 100.000 koruunit missaanniipput.
Suut partiimut aningaasartuutaassappat aningaasartuutaasanngillalluunniit? Apeqqut taanna partiimi avissaartuussutaapput.
Aningaasartuutillu partiimut attuumassuteqartuusut siulersuisuunerni ilaasortap Kim Lyberthip naqissuserpaa.
- Partiimut attuumassuteqarpoq, taamaaliunngikkuttami inatsisartuni ilaasortaatitaqarsimanavianngikkaluarpugut. Inuttut atukkat assigiinngitsut tamatumani peqqutaapput. Tilliep ataatani coronap nalaani perulummat Danmarkimiippoq. Nutserniarmallu ikiorniarlugu partiimit aalajangerparput, Kim Lyberth oqarpoq.
Aningaasartuut naatsorsuuserisup maanna isornartorsiuisup taamani akuerseqataaffigisimagaa taassuma ilanngullugu oqaatigaa.
Nuunneq: 14.214 kr.
Laserklinikimi Nuummi suliaritinneq: 3.654 kr.
Oqarasuaammut 2020-mi immiineq: 25.500 kr.
Uippakajaarnermut ikiortinneq: 50.762,50 kr.
Allat: 5860,20 kr.
Katillugit: 99.990,70 kr.
Flemming Nielsen Suleqatigiissitsisut Sermersuumi immikkoortortaqarfiani aningaaserisuuvoq, tassanilu siulersuisut amerlanerussuteqartut Tillie Martinussenip aningaasartuutaasa akilerneqarneri akerleraat.
Isornartorsiuisut paatsuungasut
Tillie Martinussenip "isikkorissartinneranut" partii sooq aningaasartuuteqartariaqarnersoq Flemming Nielsenip apeqquserpaa.
- Aningaasartuut taamaattoq pisariaqartissorigutsigu nammineerluta akilertussaannginnatsigu? Tamakkua tamarmik erseqqissarneqartariaqarput, Flemming Nielsen apeqqusiivoq.
Partiip naatsorsuuserisorisimasaata Jan Joe Seidsenip apeqqusiinermut ilaliivoq. Taanna aningaasanik taama atuineq akerleralugu Suleqatigiisitsisut siulersuisuunerannit partiimiillu oktobarip qaammataani tunuarpoq.
- "Kiinaleritinneq" partiimut attuumassutilittut siulersuisuunerit nalilersinnaammassuk paasisinnaanngilara, Jan Joe Seidsen oqarpoq.
Siulersuisuunerit ilumuunnginneraasut
Isikkorissartinnermut kiinaleritinnermullu aningaasartuuteqarneraanermut Tillie Martinussen siulersuisuunerillu ilumuunnginneraapput.
Inatsisartuni sulinermi atukkat pissutigalugit suliaritinnermut aningaasartuutaasut siulersuisuunerneersoq Kim Lyberth nassuiaavoq.
Partiimut tunngaviusumik tapiissutit ilaasortaatitaqarnermullu tapiissutit pingaarnertut isertitaapput.
Suleqatigiisitsisut aningaasaataat ukiumut 1,1 millionit koruunit missaanniipput.
Partiimut ilaasortat akiliutaat 2.725 koruuniupput.
Paasisat: Suleqatigiisitsisut 2019-imi naatsorsuutaat
- Napparsimallutit Inatsisartuniissinnaavit? Naamik. Sullivimmi avatangiisit pissutigalugit Tillie sapikkaminik sunnerneqartartupilussuuvoq. Tamannalu pillugu katsorsarneqartarpoq. Taamaammat taama suliaritittarnera suliamut attuumassuteqartorujussuuvoq, taamaalilluni inatsisartuni ilaasortaatitatsitut sulisinnaaniassagami, Kim Lyberth oqarpoq.
Suliaritinnernut tamakkununnga 2020-mi aningaasartuutinut takussutissat piniarnerini maannamut suli iluatsinngilagut.
Uippakajaarnermut ikiorneqarnermut aningaasartuutit
Partiimi suleqataasunut uippakajaarnermut ikiornerneqarnermut partii 50.762 koruuninik aningaasartuuteqarsimasoq Suleqatigiisitsisut KNR-imut paasissutissiipput.
- Sianissutsikkut peqqissuunissaq politikitsinnut ilaavoq, Tillie Martinussen taamatut aningaasartuuteqarnermut nassuiaavoq.
Aningaasartuutit partiimut attuumassuteqarnersut attuumassuteqannginnersulluunniit pisumiit pisumut Suleqatigiisitsisut siulersuisuunerisa nalilersortaraat Kim Lyberth oqarpoq. Aningaasartuutissat partiimut iluaqutaassanersut aallaaviusarluni.
Malittarisassat allanngussappata tamanna partiip ataatsimeersuarnerani eqqartorneqartariaqartoq taanna oqarpoq. Ataatsimeersuarnermi partiip pingaarnertut aalajangiisarfigaa.
Suut partiimut aningaasartuutaassanersut erseqqinnerusunik malittarisassaqartoqartariaqartoq Flemming Nielsen oqarpoq.
- Partiip aningaasaatai kimit sumullu atorneqarsinnaappat? Nuna tamakkerlugu ataatsimeersualerutta tamakkua oqaluuserusutatta ilagaat.
Suleqatigiisitsisut decembarip qaammataata qiteqqunnerani ataatsimeersuassapput.
