Suleqatigiissitsisuni upernaaq eqqissiviilliortoqareersoq: Partiimi nukiit politikkimut maanna atorneqassapput
Suleqatigiissitsisut partiimi iluani ukiaq eqqissiviilliortoqareernerata muminganiilersimapput.
- Politikkimik ineriartortitsinissatsinnut ingerlatsinissatsinnullu soorunami sunniuteqarsimavoq. Pingaartumik piffissaq ukiup nikinnissaanut pasilliutit iliorneraanerillu assigiinngitsunut atassuteqartumik saqqummiunneqartut akerlilerneqarnissaannik ukkatarinniffiuvoq.
Suleqatigiissitsisut siulersuisuuneranut ilaasortaq, Torben Ørting Jørgensen oqarpoq.
Partiimut attuumassuteqartunik aningaasartuuteqarnerup isumaqatigiinngissutiginera
Taanna partiimut tapiissutinut tunngatillugu suliamut oqaaseqartartuuvoq. Naatsumik oqaatigalugu suliaq partiip iluani partiimut attuumassuteqartunut aningaasartuuteqarnermut killissanut aamma nammineq aningaasartuutinut tunngatillugu upernaaq isumaqatigiinngitsoqarneranut tunngavoq.
KNR-ip partiip siulittaasua, Tillie Martinussen suliat partiimut qanoq sunniuteqarsimanerat pillugu oqaaseqartinniarsarigaluarpaa, taassumali Torben Ørting Jørgensen innersuussutigaa.
AAMMA ATUARUK Suleqatigiisitsisut ilaasortani tallimat ilaasortaajunnaarsikkai
Tapiissutinut suliaq partiimut ilaasortat tallimat siulersuisuunernik politiinut unnerluutiginninnerannik ilaatigut kinguneqarpoq, taannalu politiinut suli misissuiffigeqqissaarneqarpoq. Tamanna ilaasortat siulersuisuunerit Tillie Martinussenip nammineq aningaasartuutaanik akiliisimasutut pasilliuteqarnerata kingorna pivoq.
Partiip siulittaasuata, Tillie Martinussenip siulersuisuunenrillu partiimut tapiissutinik nammineq aningaasartuutinut akiliuteqarnermut atornerluineraanerit tamarmik eqqunnginnerarpaat.
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Suliarli partiimut ilaasortanut tallimanut unnerluutiginnittunut kinguneqareerpoq. Taakku partiimut innarliisumik iliuuseqarnerat pissutigalugu partiip siulersuisuinit tunuartinneqarput.
Nukiit nutaat
Tamatuma saniatigut partiiaqqami kina siulittaasuunersoq tamanut ammasumik upernaaq aamma isumaqatigiinngissutaalerpoq.
Taamani siulittaasuugallartoq, Tillie Martinussen partiip nuna tamakkerlugu ataatsimeersuarnerani Suleqatigiissitsisuni siulittaasunngorpoq, Torben Ørting Jørgensenillu oqarnera naapertorlugu ataatsimeersuarnerup kingorna partiip sammivia politikkikkullu partiimi siulersuineq eqqissisimaffiuvoq.
- Piffissaanngitsukkut qinersisoqartussanngornerani eqimattat nutaat nukiinik katersuinissamut periarfissaqarpugut politikkilu qineqqusaarutiginiagarput nassuiaaserlugu, Torben Ørting Jørgensen nuna tamakkerlugu ataatsimeersuarnermi siulersuisuunernut qinerneqartoq oqarpoq.
Malittarisassat malinneqartut
Partiip nunarput tamakkerlugu ataatsimeersuarnerata kingornatigut partiimit aningaasartuutit akuerineqartarneranut periuseq allanngortinneqarsimanersoq aperineqarami Torben Ørting Jørgensen ima akissuteqarpoq:
- Tunngavisumik ingerlatseriaaseq tassa siulersuisuni ilaasortat qassiusut aningaasartuunik akiliutinillu akuerseqqaartarnisaat pisarnertut ippoq.
Siulersuisuunernut ilaasartap, Kim Lyberthip siulersuisuunerit aningaasartuutit partiimut attuumassuteqarnersut pillugit suliamit suliamut aalajangiisartut paasissutissiissutiginikuuaa. Aalajangiinissamullu aningaasartuutit partiimut iluaqutaassanersut nalilerneqartarlutik.
AAMMA ATUARUK Suleqatigiissitsisut kommunimut qinigassanngortitsinngitsut
Torben Ørting Jørgensenip partiip aningaasaqarneranut pingaarnersiuisarneranullu tunngatillugu isertuanngissuseqartoqartoq aamma partiip kukkunersiuisut suliffeqarfiat, EY Grønland suleqatigiinnissamik isumaqatigiissuteqarfigineqarsimasoq oqaatigaa.
- Tassanilu malittarisassat periusissatullu maleruaqqusat uatsinnut suliarisimasaat eqquutsippagut, aammattaaq siulersuisuunerni ataatsimiinnitsinni eqikkaanerit tamarmik nassiuttarlutigit, taamaalillutik imaqarniliornerit tamarmik aalajangerneqartut taakkunannga pissarsiarineqarsinnaallutik.
- Taamaammat ersittoqarluarluarlunilu pissutsit uku erseqqissuseqarput, Torben Ørting Jørgensen oqarpoq.
