Suleqatigiisitsisut ilaasortani tallimat ilaasortaajunnaarsikkai
Suleqatigiisitsisut siulittaasuugallartoq Tillie Martinussen siuttoralugu sapaatiuppat ataatsimeersuassapput.
Ataatsimeersuarnissarlu qalliartortillugu partiimi aaqqiagiinngillat.
Suleqatigiisitsisummi siulersuisuunerisa partiimi ilaasortat tallimat ilaasortaajunnaarsippaat. Michael Rosing, Henrik Philippsen, Mathias Laurits Mathiasen, Flemming Nielsen kiisalu Liv Molich anisitaapput. Partiip Sermersuumi immikkoortortaqarfiani aningaaserisuugaluartup Flemming Nielsenip tamanna KNR-imut uppernarsarpaa.
Sapaatiuppat ataatsimeersuarnissaq attaveqatigiissutitigut ingerlanneqassaaq. Coronavirusi pissutaalluni ataatsimeersuarnissaq taamaassasoq aalajangerneqarpoq, tassalu Flemming Nielsen ilaasortaaqataajunnaartut sisamat peqataassanngillat.
- Ataatsimeersuarneq attaveqatigissutitigut ingerlanneqassaaq. Tassungalu isissutissarsinngikkutta peqataasinnaanngilagut, Flemming Nielsen mailikkut KNR-imut allappoq.
Flemming Nielsenip ilaasortaajunnaarsitaanissaa arlalinnik aqqi taaneqanngitsunit kissaatigineqartoq, siulersuisuunerit ilaasortaajunnaarsitsissutaanni allagaasuni, decembarip aqqaneq aappaani tigusaani, allassimavoq.
Siulersuisuunerit taamaammat ileqqorissaarnissamut ataatsimiititaliamik decembarip qulingiluaani pilersitsipput. Ataatsimiititaliaq Flemming Nielsen ilaasortaajunnaarsinneqassasoq siulersuisuunernut tamatuma kingorna inassuteqarpoq. Siullersuisullu inassut malippaat.
Siulersuisuunerit maalaarutinik tigusimasaminnik tunuliaquteqartumik arlalinnik ilaasortaajunnaarsitsisimallutik, tusagassiuutinut allapput.
- Naammagittaalliutit ilaatigut uppernarsaatitaqanngitsunik assigiinngitsunik tusagassiuutitigut unnerluussuteqarnikkut partiimut innarliisunik iliuuseqarsimanernut tunngapput, siulersuisuunerit annerusumik itisiliinatik allapput.
Siulersuisuunerit politiinut tunniukkaat
Ilaasortanut ataatsimeersuarnissamut qaaqqusissut nassiunneqartorlu partiimi ilaasortat marluk Flemming Nielsen Michael Rosingilu tusagassiuutinut nalunaaruteqarput. Taakku Henrik Philippsen, Mathias Laurits Mathiasen Liv Molichilu peqatigalugit siulersuisuunerit politiinut unnerluutigaat.
Ilaasortajunnaarsitat tallimat ukuupput:
Mathias Laurits Mathiasen, partiip Kommuneqarfik Sermersuumi immikkoortortaqarfiani siulittaasup tullia.
Flemming Nielsen, partiip Kommuneqarfik Sermersuumi immikkoortortaqarfiani aningaaserisoq.
Michael Rosing, Inatsisartuni ilaasortamut sinniisoq.
Henrik Phillipsen, siulersuisuunerni ilaasortaasimasoq maanna Danmarkimi najugaqartoq. Taanna partiimi suli ilaasortaagaluarpoq.
Liv Molich, partiip Kommuneqarfik Sermersuumi immikkoortortaqarfiani sinniisoq.
Tamanna novembarip ulluisa 20-anni pivoq.
- Suleqatigiisitsisut aningaasaataat Tillie Martinussenip nammineq aningaasartuutissaminut akiliutigisarsimasoraagut. Inatsisinik unioqqutitsisoqarsimanersoq politiit naliliiffigissavaat. Uagummi nalilersinnaanngilarput - politiit suliassarimmassuk, Flemming Nielsen novembarip 20-anni oqarpoq.
Pasilliinerit ilumuunnginneraraat
Partiimut tapiissutit Tillie Martinussenip nammineq akiligassaanut atorneqarsimanerinik pasilliinerit Tillie Martinussenip siulersuisuunerillu ilumuunnginnerarpaat.
- Partiitta aningaasaataat namminermut aningaasartuutinut atorneqarnikuunngisaannarput. Pasilliineq unittariaqalerpoq. Soorunami taamaattoqanngilaq. Uanga kisimiillunga taama isumaqanngilaq, siulersuisuunerit aamma taama isumaqarput. Partiip ilaasortaatitaanut politikimullu sulinermut aningaasartuutit taamaallaat atorneqarput, Tillie Martinussen KNR-imut novembarimi oqarpoq.
