Suleqatigiisitsisut ataatsimeersuarnerat: Tillie siulittaasutut qinigaavoq
Tillie Martinussen Suleqatigiisitsisuni siulittaasuugallartutut attuuffeqarunnaarluni siulittaasutut partiip ippassaq ataatsimeersuarnerani qinigaavoq. Siulersuisuunerni ilaasortaq Kim Lyberth KNR-imut taama paasissutissiivoq.
Partii adventip sapaataasa sisamaanni nalunaaqutaq ataatsimut aallartittumik ataatsimeersuarpoq. Siulittaasussarsiornissaq coronavirusi peqqutaalluni nittartakkatigut ataatsimeersuarnermi eqqartugassanut ilaavoq.
AAMMA ATUARUK Suleqatigiisitsisut ilaasortani tallimat ilaasortaajunnaarsikkai
Tillie Martinussen unammillerteqarani siulittaasutut sassartoq Kim Lyberth paasissutissiivoq.
- Qinersisinnaatitaasut tamarmik taasinngitsortaqaratik taasipput, Kim Lyberth oqarpoq.
Suleqatigiisitsisunilu ataatsimeersuaqataasuni 20-t missaanniittuni qinersisinnaasunit qulingiluani akerliusoqarnani qinerneqarpoq.
Nittartakkatigut ataatsimeersuartut
Partii coronavirusi peqqutigalugu nittartakkatigut ataatsimeersuassasoq siulersuisuunerit aalajangernikuuaat. Coronavirusili politikikkut suliaqarneq oqartussanit maleruagassatigut killilersugaanngilaq, soorlu Siumut novembarip qaammataata naalernerani ataatsimeersuartoq.
AAMMA ATUARUK Suleqatigiissitsisut siulersuisuuneri politiinut unnerluutigineqartut
Taamaakkaluartorliuna Suleqatigiisitsisut sooq nittartakkatigut ataatsimeersuartut?
- Siumup ataatsimeersuarnerani aningaasartuutaasa amerlaqataannik tunisinnaasuugutsigut taama ataatsimeersuarsimassagaluarpugut. Taamaaliornissatsinnulli akissaqanngilagut, Kim Lyberth oqarpoq, nangipporlu:
- Covid-19-ip ingalassimanissaa akisussaaqataaffigaarput. Pisariaqanngitsumik navianartorsiortitsilluta ataatsimoortariaqanngilagut. Ilaasortarpassuaqarpugummi aarlerinartumiittuni. Ilaatigut Tillie uangalu, taanna oqarpoq.
Kim Lyberth Tillie Martinussenilu siulersuisuunerniiginnarput. Partii 2018-imi pilersinneqarmalli aatsaat ataatsimeersuartoqarpoq.
Ataatsimeersuarnissaq sioqqullugu avissaartuuttut
Suleqatigisitsisuni avissaartuuttoqaqqammertorlu ataatsimeersuarput. Pisortanit partiimut tapiissutit qanoq atorneqartarneri, suut partiimut attuumassuteqarnersut suullu attuumassuteqannginnersut, partiimi avissaartuussutaallutik.
Tillie Martinussenip partiimut tapiissutinik, tassa inuiaqatigiit akileraarutaannik, nammineq aningaasartuutiminut atuisimaneragaanera ilumuunngitsoq Martinussenip siulersuisuunerillu aallaqqaataaniilli aalajangiusimavaat.
AAMMA ATUARUK Immikkut ilisimasalik Suleqatigiisitsisut aningaasanik atuinerannut: Malittarisassaqanngilaq
Partiimi ilaasortat tallimat ilaasortaajunnaarsitaasut sapaatip akunnerata siuliani nalunaarutigineqarpoq. Taakkua Tillie Martinussen siulersuisuunerillu partiip aningaasaataanik atornerluisutut politiinut novembarimi unnerluutigaat.
Partiimut tapiissutit atornerlunneqarsimanersut politiinit naliliiffigineqarnissaat anguniarpaat.