Immikkut ilisimasalik Suleqatigiisitsisut aningaasanik atuinerannut: Malittarisassaqanngilaq
Partiimut tapiissutit sumut atorneqassanersut malittarisassakippoq. Tassalu aningaasat eqqortumik atorneqarnersut partiit Inatsisartuni ilaasortaatitallit taavalu qinersartut naggataatigut aalajangissavaat.
- Siammasissorujussuupput. Tassalu ataatsimut isigigutsigu partiit aningaasat sumulluunniit atorsinnaavaat, aningaasat namminerminnuinnaq atunngikkunikkit, soorlu angerlarsimaffimmi pequttanut, nerisassanut allanulluunniit, partiimut tapiissutit pillugit immikkut ilisimasalik Aarhus Universitetimilu professori Jørgen Albæk Jensen KNR-imut oqarpoq.
AAMMA ATUARUK Tillie Martinussenip atornerluinerarneqarnini saassussinerlunnertut nalileraa
Maanna malittarisassavoq, partiit Inatsisartut Siulittaasoqarfiannut nalunaaruteqassasut. Tassani allassapput ukiup siuliani tapiissutit politikimut suliaqarnermut atorneqarsimasut.
Partiimut tapiissutit atornerlunneqarsimanersut uppernarsaruminaassinnaavoq, taamaammat tusagassiuutit aningaasat sumut atorneqarnerinik nakkutiginninnissaat pingaaruteqartoq, professori oqarpoq.
Partiimi ilaasortat atornerluisoqartoq erseqqilluinnaraangat pisoq politiinut suliassanngortissinnaavaat. Qinersisartulli aamma akileraarutimik atorneqarneri akuerinerlugu akerlerinerluguluunniit namminneq aalajangersinnaavaat.
- Aningaasanik atuineq saqqummiunneqarpat, amerlanerillu atornerluisimanertut nalilerpassuk, qinersinermi tullermi qinersisit amerlassusaannut sunniuteqassaaq. Tassalu partiimut pillaat ajornerpaatut taanna nalilerneqarsinnaavoq, Jørgen Albæk Jensen oqarpoq.
Suleqatigiisitsisut avissaartuuttut
Suleqatigiisitsisut partiimut tapiissutit pillugit qaammatip siuliani avissaartuutilermata periutsit oqallisaalerput.
Partiimut tapiissutit atornerlunneqarneri unitseqqullugit, Suleqatigiisitsisut siulittaasorigallagaat Tillie Martinussen partiillu siulersuisuuneri, parteeqatiminnit isornartorsiorneqarput.
Partiip Kommuneqarfik Sermersuumi immikkoortortaqarfiani amerlanerussuteqartut tatiginnikkunnaarput, naatsorsuuserisorisimasaallu Jan Joe Seidsen akerliulluni siulersuisuunernit ilaasortaajunnaarpoq.
Kalaallit Nunaanni partiimut tapiissutit
Politikimi suliat nukittorsarniarlugit Inatsisartut partiinut, Inatsisartunut ilaasortanut ilaasortanullu allanut tapiissuteqartarput.
Partii Inatsisartuni ilaasortaatitaqartoq ukiumut tunngaviusumik 850.000 koruuninik tapisisarpoq. Ilaasortarlu ataaseq 275.000 koruuninik taperneqartarluni.
Paasisat: Inatsisartut.
Aningaasat - tassa innuttaasut akileraarutaat - Tillie Martinussenip nammineq aningaasartuutiminut atortarai taakku isumaqarput.
Ilaatigut Tillie Martinussenip inimut allamut nutserneranut 14.000 koruunit missaanniittut partiip akilerpai, sapigaqarnermullu suliaritinnermut Laserklinikimut Nuummiittumut 3.654 koruunit siorna akilerneqarlutik.
Isornartorsiuineq Tillie Martinussenip "saassussinerlunnertut" nalilerlugu isumaqatiginagu KNR-imut siusinnerusukkut oqaatigaa.
Qinersineq pillaataasinnaavoq
Nunatsinni partiimut tapiissutinut inatsit Folketingimi inatsimmut assingusoq Jørgen Albæk Jensen nassuiaavoq.
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Akisussaaffik partiit siulersuisuiniinneruvoq. Amerlanerussuteqartut aningaasartuutit politikimut attuumassuteqartuunerarpatigit naammappoq. Taamaappoq partiip nammineq suna politikimik suliaqarnermut atorneqarsimanersut nalilerluarsinnaanerummagu.
- Politikikkut siuttoq nunamit allamit tikeraarpat, taanna neriniartarfimmut partiip akiligaanik neriartoqatigineqarpat, aningaasat partiimut attuumassuteqartutut nalilerneqarsinnaapput. Ilaquttalli ikinngutillu kisiisa neriartoqatigineqarpata tamanna allarluinnartut nalilerneqassaaq, Jørgen Albæk Jensen oqarpoq.
