Inuit Ataqatigiit ukiuni qulikkuutaani akileraartarnermut politikkertik qimakkiartoraat
![](/sites/default/files/styles/image_934x467/public/article_images/160895531_269731104778745_852219844132679429_n.jpg?itok=geqWdBTA)
”Allannguisa” Inuit Ataqatigiit Inatsisartunut apriilip ulluisa arfernanni qinersinissamut qineqqusaarutaasa qulequtaraat, partiillu akileraartarnermut politikkiani allannguisoqarpoq.
Inuit Ataqatigiit 1978-imili pilersinneqarmat, partiip aningaasarsiaqarnerusut qaffasinnerusumik akilereertarnissaat isumassarsiariuaannarpaat.
Amerlanerussuteqartuniilli tapersertinnissaa iluatsinngisaannarpoq, partiillu akileraartarnermut siammasissumik aaqqissuusseqqittoqarnissaa kissaatigigamiuk partiit amerlanerpaat isumaqatigiissuteqarfiginiarlugit nammineq piumasaqaatitoqqami akiginissaannut piareersimavoq.
- Isertitakinnernut akunnattumillu isertitalimmut naleqqussakkamik akileraartarnermut aaqqissuusseqqiiniarnitsinni amerlanerussuteqartunik tapersiisoqarnikuunngilaq. Tamanna tunngavigivarput, taamaakkaluartorli qanoq aaqqissuusseqqittoqarnissaanut aalajangiusimanata siammasinnerusumik aaqqissuusseqqiisoqarnissaa kissaatigaarput, Inuit Ataqatigiit siulittaasuat, Múte B. Egede oqarpoq.
- Partiit allat qanoq isumaqarnerat tunngavigineqanngilaq, Inuit Ataqatigiilli isumaqarput inuiaqatigiinnut akileraartarnermut akitsuusersuinermullu siammasissumik tunngaviliinissaq pisariaqartoq, siulittaasoq, Múte B. Egede oqarpoq.
IA-p pilersinneqarnermit politikkia
Nunatsinni akileraartarneq 1975-imi eqqunneqarpoq, taamanilu assigeeqqinnaammik procenteqartumik akileraartoqartarnikuulluni.
Kikkut tamarmik assigiimmik akileraartariaqartut, tamatumalu saniatigut akileraartitsisarnermi assigiinngitsunik procenteqartitsinissaq ajornakusoornerussallunilu Akileraartarnermut aqutsisoqarfik akiliisitsiniarnissamut sulisunik amerlanerusunik atorfinitsitsinissaanik kinguneqassasoq tunngavilersuutigineqarnikuuvoq.
Aqqaluk Lynge Inuit Ataqatigiinnik pilersitsisut ilagaat, taannalu 1978-imit 1993-imut partiimi siulittaasuuvoq. Aqqaluk Lyngellu partiimi maanna siulittaasutulli Inuit Ataqatigiit akileraartarnermut politikkiannik partiinik isumaqatissarsiorneq unammillernartuunerarpaa.
- Taamannak ukiorpassuarni - aamma aallaqaataaniit politikkeqarsimaneq ataasiuvoq, allaavorli nunatsinni akileraartarnermut politikkimik allanngortitsiniarneq taama ajornakusoortigimmat, Aqqaluk Lynge oqarpoq.
Taamaammat partiimik pilersitseqataasup nutaamik misiliinissaq isumatsialaasoraa. Aamma ukiorpassuarni politikkerineqartumik allannguisoqaraluarpat.
- Sammivimmut allamut sangusoqarusunnera paasisinnaavara, kisianni naligiinngittoqarnera piitsoqarnerata akiorniarnissaa pingaarnertut siunertaasariaqarpoq. Inuit Ataqatigiit tungaanniit qanoq allatut iliorsinnaanitsinnik saqqummiisoqarnissaa piumasarerusuppara, Aqqaluk Lynge oqarpoq.
Inuit Ataqatigiit Akileraartarnermut Atugarissaarnissamullu ataatsimiititaliarsuup innersuussutai tunngaviginiaraat Múte B. Egedep oqaatigaa. Inuit Ataqatigiit siuttuuffigisaasa Naalakkersuisoqatigiit ataatsimiititaliarsuaq 2009-mi pilersinnikuuaat.
Ataatsimiititaliarsuup innersuussutaasa taamani Naalakkersuisut nunatsinni inuiaqatigiinni naligiinnerulernissamut iliuuseqarnissaannut tunngavilertussaanikuuaat. Ataatsimiititaliarsuup innersuussutai ukiut marluk qaangiuttut saqqummiunneqarput, naallu maanna ukiut qulit qaangiutingajaleraluartut innersuussutit politikkikkut naammassineqarnissaat Inuit Ataqatigiinnit iluatsinneqarnikuunngillat.