IA-mik aallarniisut ilinniartitaanermut aatsitassarsiornermilu aalajangernerit oqalugiaammi amigaatigigaat

Inuit ataqatigiit ataatsimeersuarneranni ullumikkut arfininngornermi Hotel Hans Egedep ataatsimiittarfiani inuit 80-t missaat peqataapput.

Inuit ataqatigiit siulittaasuat Múte B. Egede takkajaarsuarmik oqalugiarpoq, oqalugiumminilu IA-p nunaqarfinnut atanera arlaleriarluni taakkartorpaa, ilaatigut oqarluni nunaqarfinni arnat Inuit ataqatigiinni ilaasortaasartut amerliartornerarlugit, taamaalillunilu aamma nunaqarfinni IA-p immikkoortortai amerlisimanerarlugit.

AAMMA ATUARUK IA-p ataatsimeersuarnerani immikkoortortaqarfiit tusaaqqusut

Oqaaserlu ima ittoq oqaatigalugu: "Nunaqarfiit pillugit siunnerfimmik ersarissumik nunarput pisariaqartitsivoq".

Tassa ataatsimut isigalugu oqalugiaat nunaqarfinnut sammeqqajaasoq oqalugiutigineqarpoq.

IA-toqqat amigarsipput

Inuppassuit akornanni tusarnaartunuttaaq ilaapput partiimik Inuit ataqatigiinnik 1976-mi pilersitsisut marluk tassaasut 73-nik ukiulik Aqqaluk Lynge aamma qaammatit marluk qaangiuppata 80-liisussaq Josef Tuusi Motzfeldt.

Taakku aperaagut Inuit ataqatigiit siulittaasuata Múte B. Egedep oqalugiaataa amigaateqarsorineraat:

- Uranitalinnik aatsitassanik piiaajumannginnerput avataaningaanniit assut maluginiarneqarsimavoq. Aammalu uuliasiornerup ammaqqinnginnissaa IA-p aalajangiusimalluarmagu - naalakkersuinikkut aalajangiussat taakkua assut avataaninngaanniit isiginiarneqarput. Isumaqarpunga tamakku annertuumik tulluusimaarutigalugit eqqaaneqarnerusariaqaraluartut, Aqqaluk Lynge naliliivoq.

AAMMA ATUARUK IA ataatsimeersualersoq - siulittaasullu tullianut qinigassanngortittoqartoq

Josef Tuusi Motzfeldtip maqaasisai tassaanerupput assassorluni ilinniarfiit sulissutigineqarnerunissaat:

- Erseqqinnerusumik oqaatigineqarsimasinnaasutut tassaapput; assassorluni ilinniartitaanerit annertusaaffigineqarnissaat pilerinartunngortinneqarnissaat aammalu nuannaartunartunngortinneqarnissaat, Josef Tuusi Motzfeldt oqarpoq.

Taannami isumaqarpoq massakkut nunatsinni ilinniarfiit marloqiusatut avissimasut, qaffasissumillu ilinniagaqarneq ukkatarineqarpallaartoq. Taamaalillunilu sanaartornerup iluani avataniit tikisitsinerit annertuallaalerlutik:

- Assassorluni ilinniartitaaneq tassaavoq nunap suulluunniit nammineq naleqartitatut siunissami sanaartukkanik pilersitsinermi naalagaaffigisassaa sunniuteqarfigisassaalu, taamaammat uanga pingaarnerpaatut eqqartortikkusutara tassaaneruvoq: Assassorluni ilinniartitaanermut tunngasoq, Josef Tuusi Motzfeldt oqarpoq.