IA-p ataatsimeersuarnerani immikkoortortaqarfiit tusaaqqusut

IA-mi qullersat tunuliaqutiminnut attaveqarnerusariarput. Taamaanngippat, partii nukikilliartulissaaq.

Nunatsinni partiini maanna annersaanni ilaasortaat maanna ataatsimeersuarneranni tunualiaqutaasunit nipit ilaat taamaappoq.

Inuit Ataqatigiit nuna tamakkerlugu ataatsimeersuarnerat nunatsinni tamarmit peqataaffigineqartumik Nuummi Timersortarfimmi ippassaq aallartippoq.

Partiip immikkoortortaqarfiinit 15-iusunit inuit 80-it missiliorlugit peqataapput.

Immikkortoqarfiit oqaluuserisassanngortitaat ullormi siullermi oqaluuserineqarput.

AAMMA ATUARUK IA ataatsimeersualersoq - siulittaasullu tullianut qinigassanngortittoqartoq

Partiillu tunuliaqutiminut attaveqarluarnerunissaa immikkoortoqarfinnit ujartorneqartunut ilaavoq.

Nuummi Inuit Ataqatigiit piumasaat ersarippoq. Ilaatigut ima taakku allapput

- Takornartaajunnaarpoq immikkoortortaqarfik avaqqullugu isumasioqqqaarnaguluunniit isumaqatiginninniarnermik ingerlatsilersarneq IAK-p malittarisassaanik aammalu immikkoortortaqarfiup malittarisassaannik unioqqutitsinertut isigisarialimmik iliortoqartarnera.

Paamiut: Qaangiinnartarpaatigut

Inuit Ataqatigiit Paamiuni immikkoortortaqarfiani siulittaasup tullia, Henrik Rachlev, peqataatinneqanngitsutut misigivoq.

- Taamanikkut Paamiut kommuneqarallarmat Inuit Ataqatigiit annerpaatut inissisimanikuupput maannakkulli ikiliartugaatsiarlutik. Tamanna ikorfartorneqarnissatsinnik kissaateqarpugut. Erngertumik takkuttarnissaat, Henrik Rachlev oqarpoq.

Taanna naapertorlugu Inuit Ataqatigiinnut ilaasortat angalallutik nunatta kujataanukaraagamik Paamiut qaanginnartarpaat.

- Soorlu ilaa kujataanut angalassappata, Paamiut qarsullugu, Paamiut aqqusaarfigineqarnani. Taanna aamma siunertarivarput, tassa tikinneqartarnissarput Paamiut.

- Oqarsinnaavunga ukioq ataaseq ilaanni marluk takkuttoqarneq ajorpoq. Taamaasilluta ilaa innuttat Paamiuniittut, politikkerinik qanimut takusaqartarnerat akuttutsikkamik, Henrik Rachlev oqarpoq.