Inuit Ataqatigiit Issittoq pillugu Danmarki isumaqatigaat

EU'p nunallu assigiinngitsut akornanni aningaasaliisartut aningaasaliinissamut pilerilersinneqarnissaat isumaqatigaara. Suliffissuimmi soorlu aatsitassarsiornermik suliaqartut soqutiginnilersinniaraanni taamatut aallartittarput.

Inuit Ataqatigiit siulittaasuat Sara Olsvig taama oqarpoq.

Taamaalilluni partiip nunanut allanut tunngasunut ministeri Kristian Jensen taperserpaa, taassumami EU kajumissaarpaa Issittumi ineriartornermut aningaasaqarnikkut tapersersuinerusariaqartoq.

- EU-mi aningaasaliinissamut aningaaseriveqarpoq - Den Europæiske Invisteringsbank. Taanna assigiinngitsutigut Kalaallit Nunaannut aamma soqutigisaqarsinnaavoq, soorlu nukissiuutinik ataavartunik pilersitsiniarnermi aatsitassarsiornerullu iluani.

Aamma atuaruk EU issittumi aningaasaliisarsinnaasoq Danmarki isumaqarput

EU-llumi Issittumut soqutiginninnera aamma ersarippoq. Taanna nunat assigiinngitsut kattuffiat sivisuumik kimigiisersimavoq Issittumi Siunnersuisoqatigiinni alaatsinaattutut ilaasortanngorusulluni. Alaatsinaattutullumi ilaasortanngorusunnera Kalaallit Nunaata Danmarkillu tapersersorpaat.

Taama tapersersuineq aamma piumasaqaatitaqartariaqartoq Sara Olsvig isumaqarpoq.

- Nunarsuarmioqatitta Issittumut soqutigisaqartut uagutsinniit paasisariaqarpaat Issittumi qanoq suleriaaseqartugut. Taamaattumik alaatsinaattutut issiaqataanissaat ajunngilluinnarpoq.

Aamma atuaruk Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq

- Soorunami Issittumi Siunnersuisoqatigiinni issiaqataaniaraanni aamma akerlianiit tigussaasumik soqutiginninneq takutinneqartariaqarpoq assersuutigalugu ilisimatusarnermut inuussutissarsiornerullu iluani aningaasaliinissamut, Inuit Ataqatigiit siulittaasuat Sara Olsvig oqarpoq.

Aamma atuaruk Pisortaq: Ilisimatusartut Kalaallit Nunaanniinnerusariaqarput

Aamma atuaruk Issittoq pillugu ilisimatusarnermi iliuusissatut pilersaarusiortut