Pisortaq: Ilisimatusartut Kalaallit Nunaanniinnerusariaqarput
Nunani allani universitetit Kalaallit Nunaat ilisimatusarfiinnartut atorpallaarpaat, Pinngortitaleriffimmi pisortaq, Klaus Nygaard, taama isumaqarpoq.
Taamaattoqarneratigullu inuiaqatigiit kalaallit nunani allani universitetit issittoq pillugu ilisimatusarnerannit annertusineqartumit pissarsiaqarfigisinnaasaat killeqarpoq.
- Ilisimatusartut Kalaallit Nunaannukarlutik paasissutissanik katersuiinnariarlutik angerlaqqittarnerannik oqaluttuaq taamaalillugu ingerlatiinnarneqarpoq. Aallareeraangatalu tusarfigeqqinneqarneq-ajorput. Qujanartumilli ullutsinni taamaakkunnaarsimavoq, ilaatigulli suli naammattuugassaasarput, Klaus Nygaard KNR-imut taama oqarpoq.
AAMMA ATUARUK Aalborg Universitet issittoq pillugu ilisimatusarnermik nukittorsaalersoq
Inuiaqatigiit paasisimasaqarfiginerusariaqaraat
Aalborgip Universitetiata issittoq pillugu ataatsimeersuartitsinerani ilisimatusartut nunanilu allani universitetit kaammattorpai inuiaqatigiinni kalaallini akuuleruleqqullugit.
- Oqaatigerusutara tassaavoq Kalaallit Nunaanniinnissaq eqqarsaatigineqartariaqartoq. Imaanngitsoq misissuivinni avinngarusimasuniittuniissasut, aammali inuiaqatigiit kalaallit akornanniittariaqarput. Danskit Kalaallit Nunaanni ilisimatusarnerannut atatillugu illoqarfiit ilisimatusarfeqarfiusut Nuuk aamma Sisimiut inissisimaffigissallugit piukkunnartuupput, Klaus Nygaard oqarpoq nangillunilu:
- Taamaaliornikkummi ilisimatusartut inuiaqatigiit suliffigisamik qanoq ittuuneri aammalu inuiaqatigiinni kalaallini sunik ajornartorsiuteqarnera paasisaqarfigilluassavaat. Kalaallit Nunaanniinnermikkut inuiaqatigiit allaanerulluinnartumik paasisaqarfisussaassavaat aammalu akileraartarnermikkut aningaasanik kaaviaartitsinermut tapertaassallutik.
Aalborgip Universitetia nuunnissamik piumasaqaateqarnianngilaq
Naak Aalborgip Universitetia Issittoq pillugu ilisimatusarnerminik annertusaaniaraluartoq, universitetip pisortaata dekan Henrik Halkierip ilisimatusartumi Nunatsinni najugaqarnissaannik pilersaaruteqanngilaq.
- Ilaatigut taamaaliortoqarsinnaavoq. Piumasaqaatigineqartariaqartutulli isiginngilarput.
Universitetip Issittoq pillugu ilisimatusarnerminik annertusaanerani ilaatigut inuiaqatigiinnik peqqinnissamillu ilisimatusarnerit annertusineqassapput. Taakkununngalu tunngatillugu ilisimatusartut piffissap ilaani inuiaqatigiinni ilisimatusarfigisaminni najugaqarnissaat sulinissaallu pissusissamisoorluinnassasoq Henrik Halkierip oqaatigaa.
Inuiaqatigiilli ilisimatusarnermit aningaasatigut iluanaarutissaat pinnagit ilisimatusarneq qitiutinneqartariaqartoq, universitetip pisortaa isumaqarpoq.
- Suliassap naammassinissaa qitiutipparput. Ilisimatusartutta sumiiffinni aalajangersimasumi inissisimanissaat pingaarnerpaajutinngilarput. Costa Ricami, Skotlandimi sumiiffinnilu allani ilisimatusarnermik suliniuteqaraangatta aamma taamatorluinnaq-ittarpoq.
AAMMA ATUARUK Issittoq pillugu ilisimatusarnermi iliuusissatut pilersaarusiortut
Naalaakkersuisoq nooqqusinianngilaq
Ilisimatusartulli Nunatsinni najugaqarnissaat pillugu inatsisiliortoqarnissaa Pinngortitaleriffiup pisortaata Klaus Nygaardip pisariaqarsorinngilaa.
Inuussutissarsiornermut, suliffeqarnermut niuernermullu naalakkersuisoq Randi Vestergaard-Evaldsen aamma isumaqarpoq Nunatsinni ilisimatusarneq Nunatta pissarsiaqarfiginerusariaqaraa. Ilisimatuulli Nunatsinnut nuunnissaannik piumasaqaateqarusunngilaq.
- Ajoraluartumik ilisimatuut taama ittut Nunatsinni piginngilagut, taamaammat assersuutigalugu Danmarkimeersut pisariaqartittarpagut. Nunatsinnulli nuunnissaannut pinngitsaalinissaat nammineq inuttut isumaqatiginngilara - pinngitsaaliineq akerlerigakku, Randi Vestergaard Evaldsen oqarpoq.
Randi Vestergaard Evaldsenip ilisimatusartut nunanit allaneersut Nunatsinni ilinniartoqarfinnik suleqateqarnissaannik kaammattorusunneruai, Nunatsinni ilinniartoqarfiit nunaqavissullu suliniutinut akuutinneqarnissaat siunertaralugu.
