Aalborg Universitet issittoq pillugu ilisimatusarnermik nukittorsaalersoq
Humanioranut fakulteti Nunatsinnut Issittumullu tunngasuteqartunik ullumikkut ilisimatusarfituaavoq, ilisimatusarnermulli tassunga inuiaqatigiit pissusaat pillugit, pinngortitami teknikkimut peqqinnissamullu tunngatillugu fakultetit siunissami ilanngutitinneqassapput.
Universitetip pisortaa dekan Henrik Halkier taama oqaluttuarpoq.
- Issittumut tunngasut ilisimatusarnermut inuiaqatigiinnullu tunngatillugu annertuumik suliassartaqarnerat pissutigalugu taamaaliorniarpugut, Henrik Halkier KNR-imut taama oqarpoq.
Aalborgip Universitetia taamaalilluni Danmarkimi universitetit allat Issittumut tunngatillugu suliaminnik annertusaasut ilagilissavaat.
AAMMA ATUARUK Issittoq pillugu ilisimatusarnermi iliuusissatut pilersaarusiortut
Universitetip pisortaa dekan Henrik Halkier naapertorlugu, Issittoq pillugu ilisimatusarnerup annertusarneqarneranut atatillugu aningaasanik amerlanerusunik immikkoortitsisoqarsimanngilaq. Ilisimatusartulli suliniutiminnut aningaasaateqarfinnut tapiiffigineqarnissaminnik qinnuteqartassapput.
Universitetimili ilisimatusarnerup Kalaallit Nunaannut iluaqutissanngortinneqarnissaa eqqarsaataasoq oqaatigineqarpoq.
- Suliniutit arlariiaat ingerlanneqassapput, taakkulu Kalaallit Nunaanni eqqaanilu inuussutissarsiornermi qitiusunik pingaarutilinnillu sammisaqarfiussapput. Suliassaqarfinnilu taakkunani ilisimasanik nutaanik tunniussaqarsinnaanissarput neriuutigaarput pitsaanerusumik, iluanaaruteqarfiunerusumik atalluarsinnaanerusumillu ingerlatsisoqarsinnaanissaa siunertaralugu, Henrik Halkier taama oqarpoq.
Aarhusip Universitetia, Københavnip Universitetia aammalu Danmarks Tekniske Universiteti (DTU) Issittoq pillugu ilisimatusarnermut ullumikkut immikkoortortaqarput.
