Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq
Nalunaarusiaq ukiaq aallartinneqarpoq, Danmarkip nunanut allanut tunngasunut politikkiata siunissami qanoq ittuunissaanut innersuussaqartussaalluni. Isumalioqatigiissitaliallu siulittaasuata, atorfilittat nuimanerit ilaata Peter Taksøe-Jensenip, sulinermini oqaatigaa Danmarkip Issittoq pingaartuutillugu nunanut allanut tunngasunut politikkimini ilaatittariaqaraa.
Taanna avisiimit ullormut saqqummersartumit Politikenimit oqaloqatigineqarsimavoq:
- Danmark Kalaallit Nunaat Naalagaaffeqatigiinnerlu eqqarsaatigalugu Issittumi pissaanilissuuvoq. Issittumi ineriartornerup Danmarkip soqutigisaanut naapertuunnerunissaat Danmarkip sulissutiginerusariaqarpaa. Taamaammat tamanna innersuussutiginiarpara, Issittorlu pillugu politikkip ataqatigiissaarneqarnerunissaa, Peter Taksøe-Jensenip oqaatigaa.
Nunat qaninnerusut, tassa Kalaallit Nunaat Issittullu saniatigut Europap sinnera, Danmarkip politikkimini pingaarnerutittariaqarai, assersuutigalugu nunani ungasissuni aaqqiagiinngissuteqarfiusuni sulinini annikillisaavigisariaqarai, atorfilittap nuimasup innersuussutigaa.
Aamma atuaruk Inuiaat inuit pillugit ukioq manna ilinnialertoqassangilaq
Israelimiut Palæstinamiullu akornanni aaqqiagiinngissutit, qeqertanilu Maldiverini pissutsinut akuliunniarpallaarnani Danmarkip nunat qaninnerusut eqqarsaatiginerusariaqarai Peter Taksøe-Jensenip innersuussutigaa.
Danmarkip nunanut allanut tunngasunut siunissami politikkissaanut tunngatillugu nalunaarusiap kingusinnerpaamik ukioq manna maajip aallaqqaataani naammassineqarsimanissaa naatsorsuutigineqarpoq.
