Inuiaat inuit pillugit ukioq manna ilinnialertoqassangilaq
Kisianni ilinniakkami tassani ilinnialernissamik neqerooruteqannginnissaq ingammik Danmarkimut naalagaaffittut pitsaanngeqisoq, Københavnip universitetiani humaniorami ilinniartut siunnersuisoqatigiivi isumaqarput.
- Tamanna aalajangiisoqartariaqarsimammat pakatseqqaqalutalu nikalloqqaqaagut, Københavnip universitetiani humaniorami ilinniartut siunnersuisoqatigiivini siulittaasoq, Laura Bech Hansen, isumaqarpoq.
Humaniora tassaavoq, inuup kulturimik oqaatsinik allanillu pilersitsisartuunera pillugu ilisimatusarneq, tassalu inuiaat inuit issittorlugu pillugit Københavnimi ilisimatusarneq tamatuma ataaniippoq.
Aamma atuaruk Ilinniartut Issittoq pillugu ilisimasat eqqumaffiginerulerniarlugit oqallittarfiliorput
Humanioramik Immikkoortortaqarfik ilinniakkani 13-ini ilinniartussanik ukioq manna tigusinianngitsoq, tassani siuttuusut tallimanngormat nalunaarput. tassalu aamma inuiaat inuit issittorlu pillugit ilinniagaq, taakkununnga ilaavoq.
Tamannali isornarluinnartoq, ilinniartut siunnersuisoqatigiivi isumaqaroput.
- Inuiaat inuit pillugit ilisimatusarneq Danmarkimut naalagaaffittut pingaaruteqaqaaq. Uggornaqaaq, aamma ilinniakkat ilisimatusaqatigiiffiillu nungulluinnartariaarullugit arlaatigut aaqqiisoqarsinnaasoq maanna neriuppugut, Laura Bech Hansen oqarpoq.
Inuit pillugit ilinniarfimmi ilinniartussanik ukioq manna tigusiniarunnaarput, Danmarkimi 2016-imi aningaasanut inatsisimmi aningaasaliissutit allanngornerisigut, Københavnip universitetiani 300 millionit koruuninik sipaartussanngormat.
Taamaaliornerlu ilinniarfinnut ilinniartukitsunut eqquivoq. Inuiaat inuit pillugit ilinniagaq, ukiuni kingullerni tallimani ukiumut arfinilinniit 20-it tikillugit ilinniartoqartarsimasoq. tamakkununnga ilaalluni.
Aamma atuaruk Eskimologinngorniartarnerup ingerlaannarnissaa Doris Jakobsenip ilungersuutigigaa
Ilinniartullu siunnersuisoqatigii vi maanna aaqqiissutissarsiorput.
- Assersuutigalugu ukioq allortarlugu aallartittoqartarsinnaavoq, ilinniaqartigiit amerlanerusalerlutik, ilinnikkalluunniit allanngortinneqarsinnaapput, ilinniartut ilinniartoqatigiinnut amerlanerusunut ilaalerlutik, Laura Bech Hansen oqarpoq.
Københavnip universitetiani Humaniorami ilinniartut siunnersuisoqatigiivi aqutsisoqatigiinnit isumaqatiginniaqatiserineqarput, qaammatillu naalernerani ataatsimeeqatigiissapput.
Inuiaat inuit pillugit ilinniakkap saniatigut ilatigut aamma Balkanimi oqaatsinik, Finlandimiut oqaasiinik, Hebræerisut, Tyrkisut Tibetimiutullu oqaasilerinermik ilinniakkat ukioq maana ilinniartoqalissanngillat.
