Eskimologinngorniartarnerup ingerlaannarnissaa Doris Jakobsenip ilungersuutigigaa

Københavnip Universitetiani Eskimologi Issittorlu pillugu ilisimatusarnerit ingerlaannarsinnaanerat, Danmarkimi Ilinniartitaanermut Ilisimatusarnermullu ministerip Sofie Carsten Nielsenip, Siumut sinnerlugu Folketingimut ilaasortamut Doris Jakobsenimut akissuteqaateqarnermini allaaseraa.
novembarip 26-at 2014 07:40

Københavnip Universitetiani aaqqissuusseqqittoqarlunilu nutarterisoqarnissaa pissutaalluni ilinniarneqarsinnaasut ilaat atorunnaarsinniarneqarput, taamaattorli eskimologiimik Issittumillu ilisimatusarnerit taakkununnga ilaanngitsut, Ilinniartitaanermut ministerip akissuteqarnermini allaaseraa:

- Ilinniarfiit ataasiakkaat namminneq nutaamik aaqqissuusseqqinnermi ilisimatusarnermi immikkoortut tulleriiaarneri pisussaaffigaat, Danmarkimi Ilinniartitaanermut ministeri Sofie Carsten Nielsen ilaatigut allappoq, Københavnip Universitetiata Eskimologiip ingerlaannarnissaa nammineq qulakkeertussaagaa erseqqissaatigalugu.

 

Ilisimatusarfiit namminneq aalajangigassarigaat

Ilisimatusarfiilli ataasiakkaat ilinniartussaminnik namminneq naammattusaarisartussaanerat aamma siunertaasoq, Ilinniartitaanermut ministerip akissuteqaataani aamma allassimavoq:

- Ilisimatusarfiit minnerit pillugit aningaasaliissutini ilisimatusarfeeqqat tapersersorniarlugit akuersissutaammata,  aaqqiissutissat ilisimatusarfiit minnerusut ingerlaqqinnissaannut navianartorsiortitsinngitsumik iluarsineqarumaartut ilimagineqarpoq. Naatsorsuutigaara ilisimatusarfiit eqaatsumik aaqqiinermikkut ilinniarfinnut ataasiakkaanut akisussaaffitik naammassiniarumaaraat, Danmarkimi Ilinniartitaanermut ministeri Sofie Carsten Nielsen, Doris Jakobsenip apeqquteqaataanut akissuteqarluni ilaatigut taama allappoq.