Ilinniartut Issittoq pillugu ilisimasat eqqumaffiginerulerniarlugit oqallittarfiliorput

Københavnimi ilinniartut Issittoq pillugu soqutigisallit naapittarfissamik oqallittarfissamik pilersitsipput.
marsip 26-at 2015 15:32

Issittoq pillugu ilisimasat eqqumaffigineqarnerulernissaat maanna suliniutigineqarnialerpoq, taamaaliornikkut Issittumi suliffeqalersinnaanissaq pillugu periarfissat aamma pitsanngotsarniarneqarlutik.

 

Ilinniartut suleqatigiiffiat ISUMA, ilinniartunut oqallittarfiusussaq, Københavnimi pilersinneqartoq, taama anguniagaqarpoq:

 

- Ilinniartunut oqallittarfiup uuma pilersinneqarnissaa uagut tamaani Københavnip Universitetiani ilinniartuusugut isumaqatigiissutigaarput. isumaqaratta faggruppini assigiinngitsuni ilinniartuugaluarluta nunanut Issittormiunut tunngasunik oqallittarfimmut anngussuisinnaalluta, ilinniartut Issittumut soqutigisaqartut ataatsimoornerulersinneqarnissaat, Eskimologimik Issittumullu tunngasunik Københavnip Universitetiani ilinniartoq Ortu Mørch suleqatitsinnut Helle Nørrelund Sørensenimut oqarpoq.

 

Ilisimatusarfiit ilinniarfiillu allat akornanni Issittoq pillugu ilisimasanik paarlaasseqatigiittoqarnissaa ISUMA aqqutigalugu suliniutigineqarniarpoq, Kalaallit Nunaannullu tunngasut immikkut aallunniarneqarlutik.

 

Ilisimatusarfiit ilinniarfiillu suleqatigiinnerat aqqutigalugu Issittoq pillugu ilisimasat siammarterniarneqarput, ilisimatusarnermut atorneqartussanngortinniarneqarlutik, Issittumilu suliffinnik pilersitsisoqarnissaa aamma siunertaalluni. Københavnip Universitetiani ilnniartut akornanni suleqatigiinnissaq aamma anguniagaavoq, pisortaqarfiillumi aamma suleqatiserineqarlutik:

 

- Ilinniarnerput naammassigutsigu sullivinnut allatigullu aamma qanimut suleqatigiillualernissarput anguniagaraarput, tamanna qitiutillugu, Ortu Mørch, Københavnip Universitetiani ilinniartoq, suliniummillu pilersitseqataasoq, oqarpoq.

 

ISUMA-mi ataatsimiinnissaq siulleq Københavnimi Illu Atlantikumi ullumi sisamanngornermi pisussatut pilersaarutigineqarpoq. Ilinniartut sisamat assigiinngitsunik ilinniagaqartut ilisimatusaatigalugu suliaq immikkuullarissoq saqqummiutissavaat.