Espersen: Kalaallit politikeriisa takorluukkersaarutaat qanoq sivisutigisumik aningaasalersussagatsigit?

Namminiilivinnissamik pilersaarutit danskit naalakkersuisuisa qanoq isumaqarfigerpiarneraat aamma apeqqutigaa? Folketingi qanoq isumaqarpa? Isummerfigineqanngilluinnarpoq. Naalaaffeqatigiinnerup katagalanerani kikkut tamarmik toqqorterput, Folketingimi ilaasortaq taama allappoq.

Danmarkip issittumi sakkutooqarnikkut aningaasaleerujussuarnissamik piareersaateqarnera isumatusaarnerunersoq aamma apeqquserpaa.

- Sooq Danmark Kalaallit Nunaannut iluaqutaasussamik aningaasarpassuarnik atuissava, kalaallimmi politikerit ulluinnarni marluinnarnik suliaqarunarput: Kalaallit Nunaata namminiilivissinnaanerata piviusorsiortuuneranik imminnut salloqittaallutik, aammalu Danmarkimit USA-miillu aningaasanik sapinngisamik amerlanerpaanik pissarsinissaminnut periarfissanik ujartuillutik?

AAMMA ATUARUK Namminiilivinnissamik kissaateqarneq Danmarkip tapersersornerusariaqarpaa

- Kalaallit politikeriisa takorluukkersaarutaannik Danmarkip aningaasalersuiinnarnera qanoq sivisutigisumik akuerineqaannassava, Espersen aperivoq nangillunilu:

- Danskit politikeriinik matuminnga oqalliseqataanissamut sapiissuseqartunik ujartuivunga. Aamma kalaallit politikerit kalaallit innuttaasut nalinginnaasut isertorlutik uannut oqaatigisartagaasa assinganik oqaaseqarnissaminnut sapiissuseqartut ujartorpakka: tassalu Danmarkip Kalaallit Nunaatalu atanerat pissusissamisoortuusoq taamaattumillu avinnissaq taamaatiinnarneqartariaqartoq.

- Tamanna anguneqarpat aatsaat Danmarkip Kalaallit Nunaanni innuttaasunut illersornissakkullu aningaasaleeqqinnissaa tulluarnerussaaq, Søren Espersenip Dansk Folkepartiimeersup Jyllands-Postenimi allaaserisani taama naggaserpaa.

AAMMA ATUARUK Namminiilernissamik kissaateqarneq Lars Løkkep ataqqivaa