Greenpeace: Uuliasiortoqartariaanngilaq
Greenpeacep oqallittoqarnissaq kissaatigalugu nalunaarusiortitsivoq. Inuiaqatigiit aningaasaqarnikkut siuariartornissamut periarfissaqarluartut, suliffissanullu nutaanik pilersitsisoqarsinnaasoq, aamma eqqaaneqarpoq.
Nalunaarusiap saqqummiunneqartup qallunaatut qulequtaqartup ’Hvor kan udviklingen komme fra? - Potentialer og faldgruber i de grønlandske erhvervssektorer frem mod 2025’, Kalaallit Nunaat uuliasiunngikkaluarluni aalisarnikkut, takornariaqartitsinikkut, aatsitassarsiornikkullu annertusaanikkut aningaasarsiorluarsinnaasoq annerusumik imaraa.
Aalisarneq, takornariartitsineq piiaaveqarnerlu matussutissaqartitsisinnaapput
Uuliasiornikkut aningaasarpassuit isertinneqarsinnaagaluartut, sooq uuliasiornissaq pisariaqannginnersoq, Greenpeacep Issittoq pillugu akisussaasua Jon Burgwald aperaarput.
- Soorunami uuliasiorluni ingerlalluaraanni aningaasarpassuit isertinneqarsinnaapput. Kisianni pingaaruteqarpoq uuliasiornermi ajutoortoqaraluarpat kingunissai eqqarsaatigilluarnissaat. Uuliasiorluni uuliakoortoqaraluarpat imarpissuaq pinngortitarlu kisimik eqqorneqartussaanngillat, aalisarneq eqqorneqartussaavoq, tamannalu ukiorpassuarni aalisarnikkut inuussutissarsiorsinnaagaluamik pinngitsoortitsisinnaavoq, Jon Burgwald oqarpoq.
2009-mili ukiumut aningaasanik 3,6 milliardinik Naalagaaffik nunatsinnut tapiisarpoq.
Aningaasallu taakkua ukiuni tulliuttuni allannguuteqartussaanngitsutut inissinneqarsimallutik.
Greenpeacep nalunaarusiortitaani naliliinerit takutippaat ukiut qulit qaangiuppata inuiaqatigiinnut tapiisarnerit naammakkunnaassasut.
Tamannalu pinaveersaartinniarlugu massakkut iliuuseqartoqariaqartoq oqariartuutigaat. Taamaaliortoqanngippammi ukiut qulit qaangiuppata aningaasaqarnikkut piujuaannartitsinissamut aningaasanik 600 millionit koruuninik amigartooruteqartoqalersinnaasoq, nalunaarusiami oqariartuutigineqarpoq.
- Taamaattumi nalunaarusiami siunnersuutit ilaapput Kalaallit Nunaat qanoq aningaasarsiornikkut ineriartortinneqarsinnaanersoq.
Siunissami aningaasarsiornikkut piujuaannartinnissaa qulakkeerumallugu, aamma pinngortitaq eriagalugu sianigalugulu qanoq aningaasarsiorluartoqarsinnaanersoq siunnersuutit ilaapput, Greenpeacep Issittoq pillugu akisussaasua Jon Burgwald oqarpoq.
