Greenland Airports aalajangiusimasoq: - Timmisartorsuaq novembarip 28-ani merngaassaaq
Nuummi mittarfissuassap illorsua juunimi ammarpoq, tassanili suli naammassisassaqaalulluni.
Mittarfissualiornermilu kinguaattooqattaarnerit naammaginanngilluinnarnerarlugu, naalakkersuisut siulittaasuata Múte B. Egedep (IA) qaammatip siuliani isornartorsiuineranik kinguneqarpoq.
Isornartorsiutaa miserratiginngikkini Greenland Airportsip pisortaanerata Jens Lauridsenip ippassaq ataasinngornermi oqaatigaa.
- Unali suliniuterujussuaq Kalaallit Nunaannut pingaartuummat taama aporfeqartiginerup pakatsissutaanera paasisinnaavara. Isornartorsiorneqarnerlu ilaanni inissaminiittarpoq, taanna oqarpoq.
Taamali suli aporfeqartigigaluartoq timmisartorsuup Tuukkap Danmarkimiit Nuummut novembarip 28-ani merngaarnissaa suli aalajangiusimaannaritsik, Jens Lauridsen oqarpoq.
- Piffissaliussarput allanngunngilaq. Suli inaarsagassaqaqaaq, isumalluaqaagulli.
- Mittarfissualiortullu Danmarkimi angallannermut aqutsisoqarfillu (Trafikstyrelsen, aaqq.) attaveqatigiilluarpugut, inaagassallu naammassinissaannut tamaviaarlutik suliaqartunik sulisorpassuaqarpoq, taanna oqarpoq.
Juunimi ammarnissaa aallaqqaataaniilli pilersaarutaasoq
Taamaammat mittarfissuassap nunani tamalaani mittarfissuartulli novembarip 28-ani atuutilernissaa qilanaarutigineqarsinnaavoq. Mittarfissuassallu ukiorpassuarni atorneqarsinnaanissaa, pisortaanerup neriuutigaa.
Mittarfissuassap illorsuata suliluunniit piariivinngitsoq ammarneqarnera inunnut nittartakkakkut attaveqatigiittarfitsigut isornartorsiorneqaqattaartoq, pisortaanerup Jens Lauridsenip aamma arajutsisimanngilaa. Tamannali nassuiaatissaqaluartoq, taanna oqarpoq:
- Mittarfissuassap illorsua suli piariivinngitsoq ammarpoq, mittarfissuassaq novembarip 28-ani atoqqaarfissiortinnagu illorsuartaani soorlu isumannaallisaanikkut, atortutigut assigisaallu tungaatigut sutigut tamatigut misilittaaqqaarnissaq siunertaalluni.
- Illorsuarmi taama angitigisumi misilittaqqaagassarpassuusarput, maannamullu naammassisaqaaloreerpugut, taanna erseqqissaavoq oqaatigalugulu mittarfissuassap atoqqaarfissiortinnagu taamaaliorunik ammarnerata kingorna taamaaliornerminngarnit pitsaanerusoq.
Suliniut tulluusimaarutigigaa
Tassa soorlu mittarfissuassap illorsua ussiikkaluartoq, mittarfissuassaq maajimi paasineqartumik itersaqaraluartoq mittarfissuassallu illorsua oqukkaluartoq suliniutip naammassingajalernera pisortaanerup tulluusimaarutigaa.
- Mittarfissuassammi illorsua ukiorpassuarnimi suliniutaavoq, taassumalu toqqavia ukiut tallimaannaat matuma siorna qaarsuuvoq, taamaammat piffissap sivikitsup ingerlanerinnaani pisoqangaatsiarnikuusoq eqqaamasariaqarpoq, Jens Lauridsen oqarpoq.
Mittarfissuassalli atoqqaarfissiortinnagu Danmarkimi Trafikstyrelsemit akuerineqaqqaartussaavoq. Mittarfissuassami isumannaallisaanermi suli qularnaagassaqarmat suli akuerisaanngilaq.
Mittarfissuassallu illorsuani suli naammassisassarpassuaqaraluartoq, Jens Lauridsen isumalluarpoq. Aammali annilaangavoq:
- Trafikstyrelsimiimmi nalilersorneqaqqaartussaavugut, kikkulluunniillu nalilersorneqarnissaminnut pissangasarput, uangalu soorunami aamma pissangaqataavunga, taanna oqarpoq.
Mittarfissuassarlu atoqqaarfissiunngitsiartoq tassa Trafikstyrelsenimit akuerineqartussaassaaq. Tamannalu novembarip 27-ata 28-atalu akornanni pisussaassasoq, pisortaaneq oqarpoq.
Trafikstyrelsili akuersinngippat susoqassava?
- Timmisartorsuit missinnaanissaannut akuersissuteqarfigineqanngikkutta taava missinnaanavianngillat. Tamanna suliffeqarfittut akisussaaffeqartutut soorunami misissuiffigissavarput. Kisianni mittarfiup naammassinissaa maanna ukkaraivarput – naammassinissaalu naatsorsuutigalutigu.
- Mittarfissuassallu illorsuani naammassisassat naammassineqariarpata piariivissaqqaarpoq. Sanasullu naammassisassat tassa ulapputigileruttorpaat, Jens Lauridsen oqarpoq.
